Senado miaprobar sa balaodnon nga mopasayon sa pagkuha og yuta alang sa mga balay sa gobyerno

Giaprobahan sa Senado sa Pilipinas niadtong Huwebes sa ikatulo ug kataposang pagbasa ang usa ka balaodnon nga nagtumong sa pagpasayon sa pagkuha ug paggamit og yuta alang sa mga programa sa gobyerno nga maghatag og barato nga mga balay sa mga kwalipikadong benepisyaryo.

Sa botong 17-0-0, giaprobahan sa mga senador ang Senate Bill No. 1992, nga mag-usab sa pipila ka probisyon sa Republic Act No. 7279, o Urban Development and Housing Act of 1992.

Ang gisugyot nga balaod magpalig-on sa legal nga sistema aron masulbad ang dugay nang problema sa kakulang sa yuta nga magamit sa mga programa sa pagpabalay. Tumong usab niini nga masiguro nga ang pagkuha ug paggamit sa yuta motakdo sa mga panginahanglan sa mga kwalipikadong benepisyaryo.

Pinaagi sa pag-usab sa kasamtangang mga lagda, gitinguha sa balaodnon nga makunhuran ang mga babag ug kalangan sa mga proseso sa gobyerno aron mas dali ug mas epektibong mapatuman ang mga programa sa pagpabalay alang sa mga nanginahanglan.

-Ato ni Bai