Sen. Villanueva Nanawagan og Dugang Benepisyo sa mga Magtutudlo ug Kawani

Giduso ni Sen. Joel Villanueva ang dugang benepisyo alang sa mga magtutudlo ug dili magtutudlo nga kawani sa publikong eskwelahan, diin iyang gipasiugda nga ang pag-ila sa ilang serbisyo kinahanglan ubanan og konkretong ug padayong suporta gikan sa gobyerno.

Gihimo ni Villanueva ang panawagan niadtong Lunes, Oktubre 5, pinaagi sa video message atol sa pagsaulog sa World Teachers’ Day sa Department of Education (DepEd) sa Araneta Coliseum, diin mitambong ang liboan ka mga magtutudlo gikan sa tibuok nasod.

Isip co-chairperson sa Second Congressional Commission on Education (EDCOM II), misaad si Villanueva nga padayon niyang iduso ang mga balaodnon nga gitumong sa pagpagaan sa gastohanong palas-anon sa mga kawani sa edukasyon.

Usa sa mga nag-unang lakang mao ang Senate Bill No. 1606, o ang gisugyot nga Allowances for Public Basic Education Personnel Act. Tumong sa balaodnon nga hatagan ang mga kawani sa publikong eskwelahan og allowance kada tulo ka bulan nga ₱3,000 alang sa pagkaon ug plete ug ₱2,000 alang sa gastong medikal. Ipasibo ang kantidad matag tulo ka tuig aron mosunod sa pagsaka sa presyo sa mga palaliton ug serbisyo.

Gipasiugda ni Villanueva nga kinahanglan himuong permanente pinaagi sa balaod ang maong mga benepisyo aron ang suporta sa mga kawani sa edukasyon dili magdepende lamang sa desisyon sa administrasyon o sa pondo nga magamit matag tuig.

Apil usab sa sakop sa balaodnon ang mga kawani nga dili magtutudlo, isip pag-ila sa ilang dakong papel sa pagpadagan sa mga eskwelahan ug sa pagtabang aron mas makatutok ang mga magtutudlo sa pagtudlo.

Gipahayag ni Villanueva sa iyang mensahe ang dakong pagpasalamat sa komunidad sa DepEd tungod sa ilang dedikasyon sa mga estudyanteng Pilipino.

“Maraming, maraming salamat po sa lahat ng inyong mga sakripisyo, dedikasyon, at pagmamahal para sa kabataang Pilipino,” matod ni Villanueva.

“Lagi ko pong sinasabi na ang kabataan ang may-ari ng ating kinabukasan. Pero kayo pong mga guro ang humuhubog sa mga kamay na hahawak nito,” dugang niya.

Miingon ang senador, kansang mga ginikanan parehong magtutudlo sa publikong eskwelahan, nga tungod sa iyang pagdako suod kaniya ang mga pangandoy ug panginahanglan sa mga magtutudlo.

“Saludo po tayo sa ating mga guro at teaching personnel. Pero higit sa palakpak, bigyan natin sila ng benepisyo at suporta, dahil ang nag-aalaga sa ating kinabukasan, dapat inaalagaan din,” matod ni Villanueva. -Ato ni Bai