Sen. JV Ejercito Mikuwestiyon sa Pagkunhod sa Pondo sa Panglawas ug Kalamidad sa 2027 Budget

Gipahayag ni Senate Finance Committee Chairperson JV Ejercito ang iyang kabalaka sa mga kausaban sa bersyon sa Kamara sa gisugyot nga 2027 national budget, lakip ang pagkunhod sa pondo alang sa preventive health care ug mga kalamidad bisan pa sa pagpangandam sa nasod sa posibleng El Niño.

Matod ni Ejercito, gipakita sa unang pagsusi nga adunay dagkong kalainan sa pipila ka pondo sa General Appropriations Bill (GAB) nga giaprobahan sa Kamara kumpara sa gisugyot sa National Expenditure Program (NEP), nga kinahanglan pang susihon pag-ayo sa Senado.

“Kinukumpirma natin na may mga pagbabago, malaking pagbabago mula NEP sa House version ng GAB. Ang aking initial reaction ay nakakapagtaka lang na nabawasan ng pondo sa ilang mga programa.”

“Striking para sa akin lalo na’ yung mga natanggal sa mga malalaking program especially sa ilan nating advocacies,” matod ni Ejercito.

Lakip sa iyang gihisgutan ang P4.45-billion nga pagkunhod sa pondo sa Health Facilities Enhancement Program sa Department of Health (DOH), samtang gipataas ngadto sa P23.9 billion ang pondo sa Medical Assistance Program (MAP).

Ang MAP naghatag og pinansyal nga tabang sa mga kabos nga pasyente aron makatabang sa pagbayad sa ilang mga gastuhon sa pagpamedikal.

Matod ni Ejercito, ang mga kausaban sa pondo daw mas nagpabor sa pagtambal sa mga sakit kaysa sa mga programa sa paglikay sa sakit, nga matod niya dili uyon sa tumong sa nasod nga hingpit nga mapatuman ang Universal Health Care (UHC).

Lakip usab sa gisugyot nga pagkunhod ang P130 billion alang sa mga proyektong adunay tabang gikan sa ubang nasod ug P9.5 billion sa Calamity Fund, bisan pa sa hulga sa El Niño.

Naglakip usab ang bersyon sa Kamara og bag-ong P10-billion nga pondo alang sa Presidential Assistance to Farmers and Fisherfolk sa Department of Agriculture.

Sa sektor sa public works, gipakita sa unang pagsusi ang P2.6-billion nga pagkunhod sa pondo alang sa right-of-way payments. Bisan og adunay P8.04 billion nga gigahin alang sa mga estruktura sa pagpugong sa baha, gipakunhod usab og P4.6 billion ang pondo sa mga proyekto sulod sa dagkong river basin.

Matod ni Ejercito, susihon sa Senado ang mga kausaban aron mahibal-an ang mga rason niini ug kung ang giusab nga mga pondo makatubag ba sa mga nag-unang panginahanglan sa nasod.

“Ang budget process, balancing act naman talaga 'yan. May nadadagdagan at may nababawasan. Pero titiyakin natin na malaman bakit may pagbabago, ano ang dahilan o purpose, at kung mapupunta ba ito sa mga pangunahing kailangan,” matod niya.

Gipahayag usab niya nga ibalik sa Senado ang pagdili sa mga item sa budget nga kulang sa detalye o mga dokumentong nagsuporta niini, ilabina ang lump-sum appropriations.

Plano usab sa Senate Finance Committee nga ipadayon ang mga lakang alang sa transparency sa tibuok paghisgot sa budget, lakip ang pagkonsulta sa civil society organizations (CSOs) ug mga watchdog group. Awhagon kini nga mga grupo sa pagtaho sa posibleng mga iregularidad ug pag-apil sa mga pagdungog, lakip ang mga deliberasyon sa bicameral conference committee.

Nadawat sa komite ang bersyon sa Kamara sa GAB alas 5:30 sa hapon niadtong Martes, samtang gipanghatag ang mga giimprintang kopya ngadto sa mga senador pagkabuntag sa Miyerkules.

Matod ni Ejercito, gimandoan na niya ang mga vice-chairperson sa Finance Committee nga magsugod sa pag-andam sa mga report sa subcommittee alang sa mga ahensyang nahuman na ang paghisgot sa ilang budget sa komite. Kinahanglang masumiter ang mga report sa Oktubre 23.

Gikatakdang hatagan sa komite og briefing ang mga CSO sa Oktubre 26 ug isumiter ang ilang committee report sa Nobyembre 11. Gikatakda usab nga ihatag ni Ejercito ang iyang sponsorship speech sa Nobyembre 23, nga sundan sa interpellation nga molungtad hangtod sa Disyembre 1.

Matod ni Ejercito, magpahigayon ang Senado og kaugalingong pagsusi sa bersyon sa Kamara aron masiguro nga ang pondo sa katawhan igahin sa hustong mga programa ug gamiton sumala sa gitakdang katuyoan niini. -Ato ni Bai