Sandiganbayan, gimando ang pagdakop kang Rep. Martin Romualdez

Gimando sa Sandiganbayan niadtong Lunes ang pagdakop sa kanhi House Speaker ug ig-agaw ni Presidente Ferdinand Marcos Jr. nga si Rep. Martin Romualdez tungod sa kasong plunder, human giakusahan nga nakadawat og mokabat $118 milyon nga kickback gikan sa mga flood-control project sa gobyerno.

Gipagawas sa anti-graft court ang mando batok kang Romualdez duha ka bulan human misaad si Marcos sa iyang State of the Nation Address nga pakusgon ang kampanya batok sa korapsyon, diin miingon siya nga “not the president of my family” ug “not the president of my friends”.

Giakusahan sa Office of the Ombudsman si Romualdez nga nakatigom og mokabat ₱7.4 bilyon ($118.21 milyon) gikan sa commissions, commitment fees, bribes ug ubang ilegal nga bayad nga nalambigit sa mga flood-control project nga gihatag gikan 2022 hangtod 2025.

Gipanghimakak ni Romualdez, kinsa House Speaker gikan 2022 hangtod 2025 ug usa ka importanteng kaalyado ni Marcos, ang mga alegasyon batok kaniya.

Miingon ang iyang abogado nga si Ade Fajardo nga atubangon ni Romualdez ang mga alegasyon sa korte ug wala kini mangayo og espesyal nga pagtratar, kondili “the same due process and fair hearing guaranteed to every Filipino”.

Mitumaw ang kaso samtang dagkong bahin sa nasud nga kanunay maigo sa mga kalamidad ang gibahaan tungod sa habagat, nga nakapadugang sa pagsusi sa publiko sa giingong mga iregularidad sa flood-control projects ug nakapukaw og dakong kasuko sa social media.

Nahimong dakong isyu sa administrasyon ni Marcos ang giingong korapsyon sa programa. Sa miaging tuig, gipahibalo niya nga ang ₱545 bilyon ($8.71 bilyon) nga gigasto sa flood control gikan 2022 hangtod 2025 giingong adunay daghang iregularidad, ug misaad siya og komprehensibong imbestigasyon.

Lakip sa dosena ka opisyal nga mi-resign o gitangtang sa puwesto tungod sa iskandalo ang iyang executive secretary, budget secretary ug public works secretary. Duha ka senador, usa ka kanhi senador ug labing menos walo ka opisyal sa public works ang nadetine usab tungod sa maong kontrobersiya.

“We are not singling out anyone. Everything is based on evidence,” matod ni Ombudsman Jesus Crispin Remulla sa mga reporter.

“This case proves that we do not take sides with anyone. We simply want those who are responsible to be held accountable,” dugang niya.

Ubos sa balaod sa Pilipinas, ang plunder kasagarang dili piyansahan.

Miingon si Jean Encinas-Franco, political science professor sa University of the Philippines, nga ang aksyon batok kang Romualdez usa ka “a step in the right direction” ug mahimong mosukol sa panglantaw nga pinili lamang ang mga kasong korapsyon nga gigukod sa administrasyong Marcos. -Ato ni Bai