Russian President Putin, miuyon sa hangyo ni Pope Leo nga tabangan ang lungsod sa Ukraine

Miuyon si Russian President Vladimir Putin nga makigtinabangay human siyang gihangyo ni Pope Leo niadtong Biyernes nga motabang sa paghatod sa mga importanteng suplay ngadto sa lungsod sa Oleshky sa Ukraine, nga kontrolado karon sa Russia, sumala sa Kremlin.

Gitawagan ni Leo si Putin ug gihangyo nga magpatuman og ceasefire aron makasulod ang mga hinabang ug pagkaon sa lungsod, nga giilog sa mga puwersa sa Russia niadtong Pebrero 2022, sumala sa Vatican. Nagreport ang mga residente nga nagkagrabe ang kakulang sa pagkaon sa maong lugar.

Gipahayag ni Leo ang iyang "deep concern" bahin sa kahimtang sa mga residente sa lungsod, dugang sa Vatican. Nagbinayloay og akusasyon ang Russia ug Ukraine nga ang matag usa maoy nagpugong sa paghatod sa mga suplay ngadto sa Oleshky, nga gustong mabawi sa mga puwersa sa Ukraine.

"The Vatican’s intention to help create the conditions necessary to ensure the safety of the town’s population and to organise vital supplies has been supported," matod sa Kremlin sa usa ka pahayag. Wala niini hisgoti ang ceasefire.

"It has been agreed to cooperate on this matter," dugang niini.

Nailhang nakaestorya na kaniadto si Leo ug Putin niadtong Hunyo 2025. Gipamatud-an usab sa Santo Papa ang padayong pasalig sa Holy See sa pagsuporta sa bisan unsang inisyatiba alang sa kalinaw, sumala sa Vatican.

Nagpaayo pa ang 71-anyos nga Santo Papa sa Gemelli Hospital sa Rome human sa operasyon tungod sa kanser sa baga. Miingon ang Vatican sayo niadtong Biyernes nga padayon ang pag-uswag sa iyang kondisyon ug makahimo na siya sa pagtrabaho ug sa iyang naandang adlaw-adlaw nga mga kalihokan. Sumala sa Kremlin, nanghinaot si Putin nga dali ug hingpit nga mamaayo si Leo.

Miingon sa mga reporter si Vatican Secretary of State Cardinal Pietro Parolin human sa ilang panag-estorya nga si Leo mismo ang mipasiugda sa pagtawag kang Putin. Matod niya, gusto sa Santo Papa nga "to plead the cause of this besieged city".

Giila sa Russia nga adunay grabeng problema sa suplay sa pagkaon ug tambal sa Oleshky ug miingon nga naningkamot ang ilang militar nga masulbad kini. Gibasol niini ang Ukraine sa krisis, nga matod sa Russia maoy nagpugong sa paghatod sa mga suplay ngadto sa lungsod. Sa laing bahin, miingon ang Ukraine nga ang Russia maoy nagbabag sa paghatod sa pagkaon.

Ang Oleshky, nga nahimutang sa Kherson region sa Ukraine, adunay populasyon nga mga 24,000 sa wala pa ang giyera. Karon, mga 1,700 na lamang ka residente ang nagpuyo didto, lakip ang 47 ka bata, sumala kang Danielle Bell, pangulo sa UN Human Rights Monitoring Mission in Ukraine.

-Ato ni Bai