Rep. Martin Romualdez gitugotang mogawas sa PGH, gibalhin sa Payatas jail

Gibalhin sa New Quezon City Jail sa Barangay Payatas si kanhi House Speaker ug Leyte Rep. Martin Romualdez niadtong Lunes sa gabii, human siya gitugotang makagawas sa Philippine General Hospital (PGH).

Gi-escort sa convoy sa Bureau of Jail Management and Penology (BJMP) si Romualdez ngadto sa pasilidad, diin miabot siya alas 10:49 sa gabii.

Gikumpirma ni BJMP spokesperson Capt. Jayrex Bustinera ang iyang pag-abot. Matod niya, moagi ang kongresista sa standard booking procedures, lakip ang medical evaluation, fingerprinting, mugshots, initial interview ug facility orientation.

Gibalhin si Romualdez human sa mando sa Sandiganbayan Third Division niadtong Lunes sa udto. Gipagawas ang mando human mipamatuod sa korte si PGH director Dr. Gerardo Legaspi nga stable na ang kahimtang ni Romualdez ug mahimo na siyang makagawas sa ospital.

Matod ni Dr. Legaspi, mga 12 ka specialist ang nagsusi kang Romualdez ug nakit-an nga ubos ang peligro nga maatake siya sa kasingkasing, samtang kontrolado ang iyang hypertension ug diabetes. Bisan pa nga nakasinati si Romualdez og anxiety ug depression, gipasabot sa PGH chief nga dili kini rason aron magpadayon ang iyang pagpabilin sa ospital.

Sa wala pa ang iyang mubo nga pagpabilin sa PGH niadtong katapusan sa semana, na-admit si Romualdez sa Cardinal Santos Medical Center, diin unang gisilbi sa mga awtoridad ang iyang warrant of arrest niadtong Setyembre 7.

Nag-isyu ang Sandiganbayan og mga warrant of arrest batok kang Romualdez, kanhi Ako Bicol Rep. Zaldy Co ug duha pa ka tawo niadtong Setyembre 7 kalabot sa plunder case nga naglambigit sa giingong kickbacks nga mokabat sa ₱7.44 billion.

Gilauman nga moabot si Romualdez sa Payatas facility alas-6 sa gabii niadtong Lunes, apan wala pa mahatag sa mga awtoridad ang hinungdan sa hapit lima ka oras nga kalangan.

-Ato ni Bai