Rep. Leviste kinahanglan mopauli ug moatubang sa korte aron makapiyansa — DOJ

Gipasiugda ni Justice Secretary Frederick Vida niadtong Miyerkules nga kinahanglan mopauli sa Pilipinas si Batangas Rep. Leandro Leviste ug personal nga moatubang sa korte aron makapiyansa.

Gipagawas sa pangulo sa Department of Justice (DOJ) ang maong pahayag human nagpagawas og warrant of arrest ang Makati Regional Trial Court batok sa kongresista tungod sa giingong paglapas sa Public Service Act.

“He needs to submit to the jurisdiction of the court. So, kailangan niya umuwi [he needs to return home],” matod ni Vida sa usa ka interbyu. Gipasiugda niya nga importanteng sundon ang mga mando sa korte aron mapadayon ang awtoridad sa sistema sa hustisya.

Giklaro ni Vida nga dili makapiyansa si Leviste samtang naa sa gawas sa nasud, bisan pa pinaagi sa mga embahada sa Pilipinas. Gitakda sa ₱72,000 ang piyansa sa kongresista. Samtang, duha sa iyang mga kauban nga giakusahan ang nakapiyansa na, sumala sa DOJ.

Anaa karon si Leviste sa France aron motabang sa iyang inahan nga si Sen. Loren Legarda, kinsa nagbakasyon sa trabaho tungod sa iyang kahimtang sa panglawas. Gikumpirma sa iyang abogado nga si Tony La Viña niadtong Setyembre 25 nga mao kini ang hinungdan sa pagbiya sa kongresista sa nasud.

May kalabotan sa maong mga panghitabo, mipahayag si Leviste pinaagi sa Facebook niadtong Miyerkules ug gikuwestiyon ang mga komento ni National Bureau of Investigation (NBI) Director Melvin Matibag bahin sa iyang kaso.

“Sinabi ni Matibag na maliit lang naman ang ₱72K na piyansa. Ano kaya ang dahilan kung bakit ginawang prioridad ng NBI Director na magsalita tungkol dito?” matod ni Leviste sa iyang Facebook post.

“Salamat sa lahat ng sumusuporta. Huwag niyo akong alalahanin, maliit na bagay lang ito kumpara sa ibang nangyayari. Kayo ang inaalala ko,” dugang niya aron pasalig ang iyang mga tigpaluyo.

Gipamatud-an usab ni DOJ spokesperson Polo Martinez ang baroganan sa gobyerno nga kinahanglan personal nga motahan si Leviste sa korte sa dili pa maproseso ang bisan unsang hangyo sa piyansa. -Ato ni Bai