QC court gipostpone na usab ang arraignment ni VP Duterte sa grave threats case

Gipostpone sa ikaduhang higayon sa Quezon City Regional Trial Court (RTC) Branch 98 ang arraignment ni Vice President Sara Duterte sa tulo ka kaso sa grave threats niadtong Biyernes, Oktubre 9, 2026, samtang girepaso pa ang importanteng legal nga mga hangyo nga gisumite sa iyang defense team.

"Minabuti nga ng judge na huwag munang ituloy ang arraignment today," matod sa lead counsel ni Duterte nga si Atty. Paul Lawrence Lim atol sa usa ka interview.

Gipasabot ni Lim nga nakahukom ang presiding judge nga ipostpone ang proceedings aron maresolba ang motion for partial reconsideration ad cautelam nga gisumite sa RTC ug ang laing petition for certiorari nga gisumite sa Supreme Court.

Matod ni Lim, ang motion naghangyo sa trial court nga usbon ang bahin sa una nitong order nga nagsalikway sa hangyo sa defense nga mohawa ang judge sa pagdumala sa kaso. Atol sa miaging hearing, gisalikway sa korte ang motion for inhibition apan giaprobahan ang hangyo sa defense nga ipostpone ang arraignment.

Naghangyo usab ang kampo ni Duterte sa Supreme Court nga magpagawas og temporary restraining order (TRO) aron mapahunong ang proceedings.

Orihinal nga gitakda ang arraignment niadtong Setyembre 11. Wala ibutyag ni Lim ang bag-ong petsa niini, nga nag-ingong ang opisyal nga iskedyul kinahanglan maggikan sa korte o sa prosecution.

Gisumite sa Department of Justice ang tulo ka kaso sa grave threats batok kang Duterte niadtong Agosto 11, nga naggikan sa iyang mga pahayag atol sa usa ka online press conference niadtong 2024. Sa maong press conference, miingon si Duterte nga gimandoan niya ang usa ka tawo nga patyon si President Ferdinand Marcos Jr., First Lady Liza Araneta-Marcos, ug ang kanhi House Speaker Martin Romualdez kon siya mismo mapatay.

Human mapasaka ang mga kaso, nagpagawas ang Quezon City RTC Branch 98 og warrant of arrest batok kang Duterte niadtong Setyembre 4. Nagpiyansa siya pagkasunod adlaw.

-Ato ni Bai