Pres. Marcos Nagmando sa Pagpangandam sa Tubig Pagkaon ug Panglawas Batok sa Super El Niño

Gipahibalo ni President Ferdinand R. Marcos Jr. niadtong Domingo ang mga pagpangandam sa gobyerno batok sa Super El Niño, lakip ang pagsiguro sa mga suplay sa ospital, pagpanalipod sa suplay sa pagkaon ug tubig, pagtabang sa mga mag-uuma, ug pagsiguro nga makapadayon sa pagkat-on ang mga estudyante bisan pa sa grabeng kainit.

Sa iyang pakigpulong sa mga reporter sa Singapore, miingon si Marcos nga nagsugod na ang El Niño Task Force sa pagkoordinar sa mga lakang, samtang ang mga ahensya sa gobyerno gikinahanglang mosumite og detalyadong mga plano.

“We met with everyone involved. Inuna ko ‘yung hospital,” matod ni Marcos, nga mipasiugda sa panginahanglan nga masiguro nga adunay kuryente, gasolina alang sa mga generator, ug mga tambal ug kagamitan ang mga ospital alang sa mga sakit nga may kalabotan sa dugay nga hulaw.

Sa agrikultura, miingon siya nga gilaom nga dili maapektuhan ang kasamtangang ani sa humay, apan nangandam na ang gobyerno alang sa sunod nga panahon sa pagpananom.

Matod ni Marcos, nagplano usab ang mga awtoridad sa pagpahigayon og cloud-seeding operations ug nag-awhag sa mga panimalay nga magtigom ug mogamit pag-usab sa tubig.

“Tuturuan namin kayo . . . We’ll give you the filter. We’ll teach you how to do everything para hindi kayo magkasakit at maayos ang pag-treat ng tubig, pag-filter ng tubig,” matod niya, nga nagtumong sa pagtudlo sa publiko sa hustong paglimpyo ug pagsala sa natigom nga tubig.

Gitan-aw usab sa gobyerno ang paghatag og tabang sa panginabuhian ug pagbansay sa mga mag-uuma nga maapektuhan pinaagi sa Technical Education and Skills Development Authority.

Miingon si Marcos nga nangandam usab ang mga opisyal og alternatibong pamaagi sa pagtudlo kung maapektuhan sa grabeng kainit ang mga klase, apan paningkamotan nga magpadayon ang face-to-face classes kutob sa mahimo.

“We'retrying to make sure that the alternative modes of teaching are available. But, find ways, as much as possible, to do face-to-face because . . . iba talaga ‘yung face-to-face kaysa sa remote,” matod niya.

Lakip sa mga ahensyang gisugo sa pagsumite og detalyadong mga plano ang Department of Science and Technology, Department of Health, Department of Social Welfare and Development, Department of Agriculture, ug Presidential Communications Office. -Ato ni Bai