Posibleng Panag-uli ni Lacson ug Cayetano, Dili Makaapekto sa Imbestigasyon sa Infrastructure Projects — Malacañang

Mipahayag ang Malacañang niadtong Martes og pagsalig nga ang posibleng panag-uli nila ni Senators Panfilo Lacson ug Alan Peter Cayetano dili makaapekto sa nagpadayong imbestigasyon sa giingong mga iregularidad sa flood control ug infrastructure projects sa Taguig City.

Misunod kini human gibutyag ni Senate Blue Ribbon Committee chair Erwin Tulfo nga gihisgutan sa usa ka bag-ong caucus sa Senate majority bloc ang posibleng pagpataliwala aron mapasig-uli ang duha ka senador.

Nangulo si Lacson sa imbestigasyon sa giingong mga iregularidad nga nalambigit sa infrastructure projects sa Taguig, nga giila nga bailiwick ni Cayetano.

“Pero naniniwala tayo na sa pagkatao po ni Senator Lacson hindi po siya makikipag-compromise para lang mawala ang kaniyang pag-iimbestiga,” matod ni Palace Press Officer Claire Castro atol sa press briefing.

“So, naniniwala tayo na tuluy-tuloy pa rin ang mga issue na dapat na imbestigahan, kung may mga ebidensiya, alam po din natin na ito ay kaniyang ipagpapatuloy,” dugang pa niya.

Miingon si Castro nga mas maayo gihapon kung masulbad sa mga opisyal sa gobyerno ang ilang mga kalainan, ug gipasiugda nga ang magkalahi nga opinyon dili kinahanglan mosangpot sa dili maayong relasyon.

“Mas maganda naman po talaga na ang bawat tao, hindi lang po public servants, lahat po sana ay nagkakasundo. May mga pagkakataon na magkakaiba nga ang opinyon pero hindi kinakailangan talaga na umabot sa hindi magandang relasyon,” matod sa opisyal sa Malacañang.

Bisan pa sa pagka-abli sa Malacañang sa posibleng panag-uli, gisalikway na ni Lacson ang ideya nga mapasig-uli ang iyang relasyon kang Cayetano.

Una nang gisumite sa opisina ni Lacson ngadto sa Office of the Ombudsman ang documentary ug testimonial evidence nga ilang nakolekta atol sa imbestigasyon sa infrastructure projects sa Taguig.

Lakip sa giingong ebidensiya ang ghost projects, double appropriations, ug paggamit sa recycled photographs gikan sa mga proyekto nga nahuman na aron suportahan ang billing ug collection sa bag-ong mga kontrata.

Gipanghimakak ni Cayetano ang mga alegasyon ug gihulagway ang mga akusasyon ni Lacson nga “general” ug “sweeping.”

-Ato ni Bai