PNP Andam sa Seguridad sa mga Lider ug Delegado sa ASEAN Summit

Andam ang Philippine National Police (PNP) sa pagseguro sa pag-host sa nasod sa 49th Association of Southeast Asian Nations (ASEAN) Summit and Related Meetings karong Nobyembre, samtang nagpadayon ang mga pagpangandam aron masiguro ang kaluwasan sa mga lider, delegado, bisita ug publiko, matod sa Malacañang niadtong Miyerkules.

Matod ni Palace Press Officer Claire Castro, nakigkoordinar ang PNP sa mga hingtungdang ahensiya sa gobyerno, local government units ug ubang security partners alang sa pagdeploy sa mga personnel ug pagpatuman sa seguridad atol sa regional gathering.

“The Philippine National Police is ready to secure the 49th ASEAN Summit this November 2026,” matod sa PNP sa usa ka pahayag nga gibasa ni Castro atol sa Palace briefing.

“We are committed to ensure the safety of participating heads of states, delegates, guests and the public, and maintain peace and order throughout the event,” dugang niini.

Matod ni Castro nga nagpadayon ang mga pagpangandam sa seguridad, samtang naningkamot ang mga awtoridad nga mahimong andam sa pagtubag sa bisan unsang sitwasyon atol sa summit.

Gipagawas ang pahayag sa Malacañang taliwala sa mga report nga adunay pipila ka protesters nga naghunahuna sa pagpahigayon og mga demonstrasyon atol sa ASEAN Summit tungod sa mga isyu lakip ang posibleng pagtambong ni United States President Donald Trump ug ang gisugyot nga Pax Silica initiative.

Matod sa PNP, seryoso niini nga gitagad ang maong responsibilidad ug magpabiling “alert, professional and ready” aron makatabang sa pagsiguro sa luwas, malinawon ug hapsay nga pagpahigayon sa summit.

Gideklarar sa Malacañang ang Nobyembre 16-18 isip special non-working days sa Metro Manila kalabot sa pag-host sa nasod sa regional meetings.

Tungod sa gipaabot nga mga demonstrasyon, gisubli ni Castro ang panawagan ni President Ferdinand R. Marcos Jr. sa mga Pilipino nga maabiabihong dawaton ang mga langyaw nga delegado samtang gitahod ang constitutional right to peaceful expression.

Matod niya, mahimong magpadayon sa pagpahayag sa ilang mga reklamo ang mga gustong mobuhat niini, apan gihangyo niya sila nga ipahigayon ang mga demonstrasyon sa laing adlaw imbis atol sa regional gathering.

-Ato ni Bai