PNP: 91 ka armas nga nakarehistro kang Sen. Bato dela Rosa wala pa makit-i

Gipadayag sa Philippine National Police (PNP) niadtong Lunes nga 91 ka armas nga nakarehistro kang Sen. Ronald “Bato” dela Rosa wala pa makit-i human administratibong gibawi ang iyang lisensya ug mga rehistro sa armas.

Miingon si Civil Security Group (CSG) Director Maj. Gen. Alden Lagradante atol sa press briefing sa Camp Crame nga 117 ka armas nga nakarehistro kang Dela Rosa ang ilang gisubay, diin 26 na ang natugyan.

Matod ni Lagradante, padayon ang PNP sa pakigkoordinar sa legal officer ni Dela Rosa, nga nagsumite og hangyo nga ikonsiderar pag-usab ang pagbawi sa lisensya.

“Continuous ’yung ating coordination to his legal officer. Their last letter submitted was actually for reconsideration,” matod niya.

Miingon si Lagradante nga ubos sa kasamtangang mga lagda, kinahanglan itugyan ang mga armas samtang padayon ang PNP sa pagsubay sa nahibiling mga armas.

Dugang niya, padayon usab ang tibuok nasod nga kampanya sa PNP sa pagsubay sa mga armas nga walay balidong rehistro, diin ilang giatubang ang mga 1.1 milyon ka armas nga paso na ang rehistro ug mga 300,000 ka lisensya nga gibawi.

Miingon si PNP chief Gen. Jose Melencio Nartatez Jr. nga ang mga armas nga walay balidong rehistro kasagarang nalambigit sa mapintas nga mga krimen, lakip ang murder, homicide ug physical injuries.

“Our campaign against loose firearms is a continuing one lalong-lalo na (especially) it is one of the denominators in the commission of crime,” matod ni Nartatez sa maong press briefing.

Gipahinumdoman niya ang mga lisensyadong tag-iya sa armas nga siguruhong luwas ang ilang mga armas ug motuman sa mga kinahanglanon sa pagparehistro. -Ato ni Bai