Pilipinas Wala Pay Plano nga Mobalik sa ICC — Malacañang

Nagpabiling lig-on si President Ferdinand R. Marcos Jr. sa iyang baruganan nga dili pa mobalik ang Pilipinas sa International Criminal Court (ICC) sa pagkakaron, matod sa Malacañang niadtong Miyerkules.

Gihimo ni Palace Press Officer Claire Castro ang pahayag human giawhag ni United States (US) President Donald Trump ang mga miyembrong nasod sa ICC nga mohawa dayon sa international tribunal.

“Hindi pa po napapanahon ang pag-rejoin sa ICC sa ngayon,” matod ni Castro sa mga reporter.

Atol sa iyang pakigpulong sa 81st United Nations General Assembly niadtong Martes, gitawag ni Trump ang ICC nga “rogue institution” nga gipadagan sa usa ka “evil group of people.”

Matod ni Castro nga gitahod sa Malacañang ang panawagan ni Trump, apan iyang gipasiugda nga wala mausab ang baruganan ni Marcos bahin sa paghawas sa Pilipinas gikan sa ICC.

“Kung ano po iyong kanyang nasabi before, patungkol sa pagre-rejoin sa ICC, hanggang sa ngayon ay ‘yun pa rin po ang stance ng ating Pangulo,” matod niya.

Gisubli ni Castro nga gipahibalo na sa Pilipinas sa US ang baruganan ug kahimtang niini bahin sa gitakdang trial sa ICC kang former president Rodrigo Duterte tungod sa giingong crimes against humanity nga may kalabotan sa kampanya batok sa ilegal nga droga sa iyang administrasyon.

Sa dihang gipangutana kon unsay mahimong epekto sa pinakabag-ong mga kalamboan sa pagdumala sa ICC sa kaso ni Duterte, mipahayag si Castro og pagsalig nga “no effect” kini.

“Sa atin po, nakikita sa ngayon, pangkalahatan naman, ay nakikita natin ’yung umuusad ang hearing sa nasabing kaso ni dating Pangulong Duterte,” matod niya.

“So, ang mga complainants, ang mga abogado, ang mga prosecutors, kahit naman po ang depensa, ay nakikita po natin na iginagalang nila ang umaandar na paghi-hearing, paglilitis sa nasabing kaso na kinakaharap ni dating Pangulong Duterte,” dugang ni Castro.

Pormal nga mihawa ang Pilipinas sa ICC niadtong Marso 17, 2019, usa ka tuig human gipahibalo ni then-president Duterte ang paghawas sa nasod gikan sa Rome Statute, ang tratado nga nagtukod sa tribunal.

Niadtong Marso 2018, gimando ni Duterte ang paghawas sa Pilipinas gikan sa Rome Statute human sa preliminary examination sa ICC prosecutor sa giingong mga krimen nga nahimo atol sa kampanya batok sa ilegal nga droga sa iyang administrasyon.

Karon detinado si Duterte sa ICC Detention Centre sa The Hague, Netherlands, ug nag-atubang og mga kaso sa crimes against humanity nga giingong nahimo may kalabotan sa iyang drug war tali sa Nobyembre 1, 2011 ug Marso 16, 2019. -Ato ni Bai