Pilipinas ug Poland Nagpirma og Kasabotan sa Legal nga Tabang

Nagpirma ang Pilipinas ug Poland niadtong Martes og kasabotan alang sa mutual legal assistance sa mga kasong kriminal samtang gipalawom sa duha ka nasod ang kooperasyon batok sa mga krimen nga naglangkob sa lain-laing nasod ug nagpahayag sa pagkaandam nga magsugod og negosasyon alang sa extradition agreement.

Gipahigayon ang pagpirma human sa bilateral meeting ni President Ferdinand R. Marcos Jr. ug sa mibisitang Polish President Karol Nawrocki sa Malacañang.

“Today, we witnessed the signing of the Agreement on Mutual Legal Assistance in Criminal Matters,” matod ni Marcos sa iyang media statement human sa ilang bilateral meeting.

Miingon siya nga ang duha ka nasod usab “affirmed our readiness to commence negotiations on an extradition agreement.”

Gipalapdan sa maong kasabotan ang una nang kasabotan bahin sa pagbalhin sa mga tawo nga nasentensiyahan, nga gipirmahan niadtong Hunyo ning tuiga.

Matod ni Marcos, usa ang legal nga kooperasyon sa mga importanteng hisgutan sa bilateral meeting, uban sa depensa ug seguridad, pamatigayon ug industriya, agrikultura, siyensya ug teknolohiya, ICT, enerhiya ug relasyon tali sa mga katawhan sa duha ka nasod.

Miingon ang Presidente nga nagtinabangay usab ang Pilipinas ug Poland aron mapalig-on ang kooperasyon sa agrikultura pinaagi sa pamatigayon, pagsulod sa merkado, sanitary and phytosanitary cooperation, teknolohiya sa agrikultura, panukiduki ug edukasyon.

Anaa si Nawrocki sa Manila alang sa usa ka working visit, ang unang pagbisita sa usa ka pangulo sa Poland sa nasod. -Ato ni Bai