Pilipinas Miduso sa Diplomasya ug Internasyonal nga Balaod sa Pagsulbad sa mga Panagbangi

Giawhag sa Pilipinas nga sulbaron ang mga lalis ug panagbangi pinaagi sa diplomasya ug internasyonal nga balaod imbis paggamit og puwersa, samtang nagpasidaan nga ang nagpadayong mga panagbangi, lakip sa Middle East ug Ukraine, naghatag og kadaot sa pangkalibotang ekonomiya.

Gihimo ni Foreign Affairs Secretary Maria Theresa Lazaro ang maong panawagan sa iyang pakigpulong atol sa 81st United Nations General Assembly sa UN headquarters sa New York City niadtong Sabado, diin iyang giingon nga kapin sa 50 ka panagbangi ang nagpadayon sa tibuok kalibotan samtang nagkakusog ang geopolitical competition ug nagkahuyang ang multilateral institutions.

“When more than 645 million people face hunger, when our climate remains in a state of calamity, and when our collective conscience is stained by humanitarian catastrophes, reflection must give way to urgent, united resolve,” matod niya.

“We cannot continue down fragmented paths in an interconnected world,” dugang niya.

Matod ni Lazaro, ang padayong pagkabalda sa pagbiyahe sa mga barko sa Middle East lamang mahimong hinungdan sa krisis sa enerhiya sa Pilipinas, samtang ang gubat sa Ukraine nagpasamot sa pangkalibotang krisis sa pagkaon ug mga kakurat sa ekonomiya nga wala pa masinati sukad sa Second World War.

“Peace, therefore, is not merely the absence of war. It is our shared and indivisible responsibility,” matod niya.

Bahin sa Gaza, gisubli ni Lazaro ang panawagan sa Manila alang sa gilayon ug padayong ceasefire, pagpanalipod sa mga sibilyan, ug pagbuhi sa tanang hostages, samtang giawhag ang tanang partido nga mosunod sa internasyonal nga balaod ug mobalik sa panag-istorya.

Gipamatud-an pag-usab niya ang suporta sa Manila sa katungod sa katawhang Palestinian sa self-determination. Matod niya, ang two-state solution, diin magpuyo nga magtapad ang Israel ug Palestine, mao ang “only viable path to lasting and durable peace.”

Matod ni Lazaro, ang pamaagi sa Manila sa kalinaw magamit usab sa mga lalis sa kadagatan, ug iyang gipasiugda nga ang internasyonal nga balaod kinahanglan magpabiling “guiding lighthouse” sa matag nasud, lakip ang United Nations Convention on the Law of the Sea.

Gikutlo niya ang 2016 South China Sea Arbitral Award isip pagpamatuod sa “how international law provides states with peaceful means to clarify rights and resolve differences.”

“The Philippines stands firm in its conviction that disputes must be resolved through diplomacy and law, not violence and might,” matod niya.

Giawhag usab ni Lazaro ang mas lig-on nga UN aron matubag ang mga hulga sa internasyonal nga kalinaw ug seguridad ug gisuportahan ang mga panawagan alang sa mas dakong representasyon sa Security Council.

“We need to reflect deeply on the promises of our charter and on the state of our fractured world. We must actively seek collective pathways that transcend borders and bridge divides,” matod niya.

“And above all, you must always put a face to what we do, remembering that every policy, every treaty, and every institutional reform is ultimately about real human lives.” -Ato ni Bai