Pilipinas, giberipika ang report nga 14 ka Pinoy gi-recruit sa Russia

Giberipika pa sa Pilipinas ang mga report nga 14 ka Pilipino ang giingong gi-recruit sa Russia alang sa gubat niini batok sa Ukraine, matod sa Department of Foreign Affairs (DFA) niadtong Biyernes.

Sa usa ka statement, gipahayag ni spokesperson Analyn Ratonel nga nahibalo ang DFA sa mga report bahin sa mga Pilipino nga posibleng naapil sa foreign armed forces ug hugot kining nakig-coordinate sa mga foreign service post niini.

“The Department's priority is the safety and welfare of Filipinos,” matod niya.

“Where appropriate, the Philippine Government remains ready to provide consular assistance consistent with Philippine law, international practice, and applicable regulations of the host country,” gidugang niya.

Gipahinumdoman usab sa DFA ang mga Pilipinong nangitag trabaho sa gawas sa nasod nga mag-amping sa pagdawat og overseas employment offers ug beripikahon kung lehitimo ang mga recruiter ug employer, ilabi na kon adunay peligro nga ma-recruit ngadto sa foreign armed forces.

Sa virtual press conference nga gipahigayon sa European Union niadtong Miyerkules, gipahayag ni Munira Mustaffa, executive director sa Malaysia-based security consultancy nga Chasseur Group, nga 14 ka Pilipino ang gikatahong gi-recruit sa Russia aron makig-away sa gubat. Gibase niya kini sa datos gikan sa Coordination Headquarters for the Treatment of Prisoners of War.

Matod ni Mustaffa, usa kanila ang namatay samtang usa ang prisoner of war.

-Ato ni Bai