Pagkuha kang Bonoan isip co-accused sa graft case, gisupak ni Senator Estrada

Gisupak sa kampo ni detained Senator Jinggoy Estrada niadtong Martes ang hangyo sa mga state prosecutors nga tangtangon si kanhi Public Works and Highways Secretary Manuel Bonoan isip co-accused sa graft case nga giatubang nila sa Sandiganbayan, nga magtugot kaniya nga mahimong cooperating witness sa daghang kaso nga may kalabotan sa flood control.

Misunod ang pagsupak human nagsang-at ang mga prosecutor og Motion for Leave to File Amended Information niadtong Hunyo 29 aron ipatangtang si Bonoan sa kaso. Gipaminaw sa Sandiganbayan Second Division, nga gipangulohan ni Presiding Justice Geraldine Faith Econg, ang mga argumento sa duha ka panig atol sa hearing niadtong Martes.

Mipahayag ang lead counsel ni Estrada nga si Laurence Arroyo nga ang pagtangtang kang Bonoan sa kaso makadaot sa depensa sa senador.

“Usbon niini ang mga depensa nga magamit karon ni Senator Estrada,” matod ni Arroyo sa korte.

Midugang siya nga ang gisugyot nga amended information magtangtang sa alegasyon nga nagkunsabo sila Estrada ug Bonoan sa pagbuhat sa maong sala, nga matod niya usa ka mahinungdanong bahin sa depensa.

Mitubag ang state prosecutor nga si Reza Casila-Derayunan nga pormal lamang ang maong amendment ug dili kini makausab sa mga alegasyon batok kang Estrada.

“Nag-atubang gihapon si Accused Estrada sa samang criminal case nga naggikan sa samang mga kamatuoran,” matod ni Casila-Derayunan.

Bisan pa sa pag-insister sa mga prosecutor nga procedural lamang ang amendment, nagpabilin ang baruganan sa kampo ni Estrada nga kini usa ka dakong kausaban nga mahimong makadaot sa depensa sa senador.

Human mapaminaw ang duha ka panig, miingon si Presiding Justice Econg nga isumite na alang sa resolusyon ang maong motion.

“Nakadungog na ang korte og igo nga mga argumento,” matod ni Econg. “Gusto namo nga magpagawas og hingpit nga resolusyon.”

Nagpabilin si Bonoan ubos sa hospital arrest sa Philippine National Police General Hospital, samtang si Estrada anaa sa detensyon sukad pa niadtong Hunyo 1.

Pareho silang nag-atubang og kasong plunder sa Sandiganbayan Fifth Division tungod sa giingong kickbacks gikan sa mga flood control projects niadtong 2025.

Ang laing graft case nga anaa sa Sandiganbayan Second Division may kalabotan sa giingong ₱213 milyon nga kickbacks gikan sa mga flood control projects sa Bulacan, nga matod sa mga prosecutor katumbas sa mga 25 porsiyento sa ₱855 milyon nga kantidad sa flood control contracts sa probinsya.

-Ato ni Bai