P7.232-Bilyon nga 2027 Budget sa Ombudsman, Giaprobahan sa Senate Panel

Giaprobahan sa Senate Committee on Finance ang gisugyot nga P7.232-bilyon nga budget sa Office of the Ombudsman alang sa 2027, nga magtugot nga madala na ang funding proposal sa ahensya ngadto sa plenary deliberations.

Gipangulohan ang committee ni Senior Deputy Majority Leader JV Ejercito, kinsa miingon nga suportahan sa mga magbabalaod ang mga lakang nga nagtumong sa pagpalig-on sa kapasidad sa Ombudsman sa pag-imbestigar ug pagpasaka og kaso sa korapsyon.

Una nang nangayo ang Ombudsman og P12.797 billion gikan sa Department of Budget and Management (DBM).

Usa sa mga lakang nga gustong suportahan sa committee mao ang gisugyot nga Ombudsman Marshal Service, nga nangayo og dugang P168 million nga pondo.

Magmugna ang maong serbisyo og 100 ka posisyon nga maoy motuman sa cyber warrants, mosiguro sa mga ebidensya, mopatuman sa mga mando, ug maghatag og proteksyon sa mga imbestigador sa Ombudsman.

“I think the establishment of the Ombudsman Marshal Service will be very important to the performance of their duties. Mas dedicated at mas vetted ang mga personnel na directly assigned sa Ombudsman kaysa i-asa sa ibang law enforcement agency,” matod ni Ejercito niadtong Huwebes, Setyembre 3.

Mga Kaso sa Flood Control

Gipahibalo usab sa Ombudsman sa committee ang kahimtang sa mga imbestigasyon niini sa giingong mga iregularidad nga nalambigit sa flood control projects.

Sumala sa pinakabag-ong datos sa ahensya, 35 ka kaso ang nakaabot na sa mga korte, lakip sa Sandiganbayan ug Regional Trial Courts. Laing 166 ka kaso ang giagian og preliminary investigation, samtang 107 ka lifestyle check ang gihimo.

Miingon si Ejercito nga kinahanglan ipadayon ang mga imbestigasyon ug ang mga mapamatud-ang responsable sa mga kalapasan kinahanglan manubag ubos sa balaod.

“Kung may ebidensya ng korapsyon, dapat managot. Kung may mga taong sangkot sa pagnanakaw ng pera ng bayan, kailangan nating tiyakin na mapapanagot sila sa ilalim ng batas,” matod niya.

Nangayo usab ang Ombudsman og P148 million nga confidential funds, nga mas taas kumpara sa P51.47 million nga girekomenda sa DBM.

Miingon si Ejercito nga wala pa makahukom ang committee kon ibalik ba ang tibuok kantidad nga gihangyo sa ahensya, apan posible nga dugangan sa mga magbabalaod ang pondo inig-abot sa budget sa plenary.

“We cannot promise that the P148 million being requested by the Ombudsman will be fully restored. But we might add a little, especially after hearing what programs and investigations could be affected,” matod ni Ejercito.

Gipasiugda niya nga ang confidential funds sakop gihapon sa mga lagda sa accountability ug kinahanglan gamiton lamang sa lehitimong mga katuyoan.

“Confidential funds do not mean that they are unaccountable. They still have to be properly justified and used for legitimate investigative purposes. May mga pagkakataon kasi na kailangan talagang confidential, particularly in gathering information,” matod niya.

Miingon si Ejercito nga nagpabilin ang polisiya sa Senate nga limitahan ang confidential funds ngadto sa law enforcement, national security, ug investigative agencies.

Susihon usab sa committee ang proposal sa Ombudsman alang sa usa ka bag-ong building, diin miingon si Ejercito nga kinahanglan una kining mapamatud-an nga gikinahanglan tungod sa limitadong pondo sa gobyerno.

Miingon siya nga gikonsiderar usab sa ahensya ang pagpalit og existing nga building imbis magtukod og bag-o, lakip ang mga property nga posibleng nabakante human sa pagsira sa pipila ka Philippine offshore gaming operator (POGO) facilities.

“Kung makakahanap sila ng good deal or bargain na existing building, that may be more practical than constructing a new one, which could cost much more. But we will have to study the proposal and see if it is justified,” matod ni Ejercito.

Midugang siya nga ang bisan unsang pagpalit kinahanglan gihapong mosunod sa gikinahanglang legal ug budgetary requirements. -Ato ni Bai