Operasyon sa Kapulisan Taliwala sa mga Alegasyon sa ICC Warrant, Dili Sakop sa Iyang Mandato— Bong Go

Gisalikway ni Senador Christopher Lawrence “Bong” Go ang mga suhestiyon nga nagdugtong kaniya sa mga operasyon sa kapulisan, ug gipasiugda nga dili sakop sa iyang katungdanan isip magbabalaod ang mga aksyon sa pulisya ug ang pagpatuman sa mga warrant of arrest.

Gihimo ni Go ang maong pahayag taliwala sa mga report nga nagpagula kuno ang International Criminal Court (ICC) og warrant batok kaniya isip kabahin sa imbestigasyon sa kampanya kontra droga sa administrasyon ni kanhing Presidente Rodrigo Duterte

“Ipinagpapasa Diyos ko na lamang po ang lahat. Buong buhay ko, wala po akong nilabag na anumang batas ng tao o batas ng Diyos (Gitugyan ko na lamang ang tanan sa Diyos. Sa tibuok nakong kinabuhi, wala ako makalapas sa bisan unsang balaod sa tawo o sa balaod sa Diyos), ” matod ni Go.

Gipadayag sa senador nga wala gayud maapil sa iyang mga responsibilidad ang mga butang nga may kalabotan sa kapulisan ug naglaum siya nga dili mahimong politikal nga isyu ang maong alegasyon.

“Police matters have never been part of my mandate. I hope and pray na hindi mapupulitika ang issue hinggil sa sinasabing ICC warrant daw laban sa akin (Wala gayod sa akong mandato ang mga kalihokan nga may kalabotan sa kapulisan. Naglaum ko nga dili kini himuong politikal nga isyu kabahin sa giingong ICC warrant batok kanako),” dugang niya.

Mipasalig usab si Go nga magpabilin siyang naka-focus sa pagserbisyo sa publiko bisan pa sa kontrobersiya.

“Umasa po kayo na patuloy lang ako sa aking pagseserbisyo, dahil ’yan ang kailangan ngayon ng ating kapwa Pilipino. Hindi ko sasayangin ang tiwalang ibinigay sa akin ng 27 milyong Pilipino (Magpadayon ako sa pagserbisyo sa publiko tungod kay mao kini ang gikinahanglan karon sa atong mga kaigsoong Pilipino. Dili nako usikan ang pagsalig nga gihatag kanako sa 27 milyon ka Pilipino),” matod sa senador.

Misunod ang iyang pahayag human miingon si Paolo Duterte nga nakadawat siya og impormasyon gikan sa usa ka “highly reliable source” nga adunay mga warrant nga giisyu kuno batok kang Go ug duha ka kanhing opisyal sa kapulisan.

Apan miingon si Jose Melencio Nartatez Jr. nga wala pa makadawat ang mga awtoridad og bisan unsang opisyal nga komunikasyon, direktiba, o dokumento mahitungod sa maong giingong ICC warrants.

“We rely on formal processes and verified information, not speculation or social media posts(Nagasalig kami sa pormal nga mga proseso ug napamatud-ang impormasyon, dili sa mga espekulasyon o mga post sa social media),” matod ni Nartatez.

Mipahayag usab sila Jonvic Remulla ug Melvin Matibag nga wala usab sila makadawat og komunikasyon gikan sa ICC kabahin sa maong mga warrant.

Niadtong miaging bulan, gikumpirma sa International Criminal Court nga adunay warrant of arrest nga giisyu batok kang Ronald ‘Bato’ dela Rosa.

Sa sayo pa, miingon si Antonio Trillanes IV, usa sa mga nagreklamo sa kaso sa ICC, nga gilauman usab nga magpagula ang tribunal og warrant batok kang Go, nga giila isip usa ka co-conspirator sa kaso sa crimes against humanity batok kang kanhing Presidente Rodrigo Duterte.

-Ato ni Bai