Ombudsman misusi sa kanhing opisina ni Senator Estrada human giingong gitangtang ang mga gamit ug fixtures

Nagpadala ang Office of the Ombudsman og mga representante aron susihon ang kanhing opisina ni Senator Jinggoy Estrada sa Senado human sa mga taho nga gitangtang ang mga muwebles, electrical sockets, tiles, ug uban pang kagamitan niini.

Matod ni Senate President Sherwin Gatchalian, nangayo og pagtugot kaniya ang anti-graft agency aron inspeksiyonon ang opisina, nga gikatahong halos wala nay nahibiling gamit human gitangtang ang mga muwebles ug electrical wiring niini.

“They sent me a letter asking permission to inspect. We can look at the records of this issue. They can also obtain documents. They did not say what their purpose was. It is obvious, the Ombudsman,” matod ni Gatchalian.

“My instruction to the secretary was to extend our cooperation, assist them with their needs, and be truthful and honest with the documents,” matod ni Gatchalian.

Dugang niya, nakigtambayayong usab ang Senado sa ubang ahensiya sa gobyerno, lakip ang Philippine National Police ug National Bureau of Investigation.

Matod ni Gatchalian, mitabang ang Office of the Sergeant-at-Arms sa Senado sa mga representante sa Ombudsman atol sa ilang inspeksiyon sa pasilidad ug opisina.

Gisusi usab sa Government Service Insurance System (GSIS) ang opisina pipila ka adlaw ang milabay human makakita og mga hulagway sa kahimtang niini, matod ni Gatchalian.

Matod niya, nabalaka ang GSIS sa kalig-on sa estruktura sa opisina tungod kay ang maong propiedad iya sa ahensiya sa seguro sa gobyerno.

Sa dihang gipangutana bahin sa kahimtang sa opisina nga gibiyaan ni Estrada, mipahayag si Gatchalian og kasagmuyo, nga nag-ingong magkinahanglan og taas nga panahon ang sunod nga mogamit niini, si kanhi Senate President Vicente “Tito” Sotto III, aron ayohon ang maong lugar.

Matod niya, motabang ang Senado sa pagpadali sa renovation, apan gipasiugda niya nga ang hustong koordinasyon unta makapugong sa paglangan sa pagbalhin ni Sotto ug sa dugang gasto sa gobyerno.

-Ato ni Bai