Muslim groups ug mga kaalyado ni Padilla, nagtigom sa DOJ atol sa obstruction probe

Nagtigom ang mga supporters ni Sen. Robinhood “Robin” Padilla, lakip ang mga Muslim group ug iyang mga kaalyado sa politika, sa gawas sa Department of Justice (DOJ) niadtong Biyernes aron ipakita ang ilang suporta sa senador samtang miatubang kini sa preliminary investigation bahin sa kasong obstruction of justice.

Miapil sa rally ang mga miyembro sa PDP-Laban, Duterte Youth, Inday Sara Duterte Advocacy group, Eagles Brotherhood, ug mga Muslim nga supporters ni Padilla sa gawas sa DOJ compound mga alas 1:30 sa hapon. Nagdala og mga banner ug tarpaulin ang mga demonstrador aron ipahayag ang ilang pagsupak sa subpoena sa DOJ ug ang ilang suporta sa senador.

Personal nga mitambong si Padilla sa preliminary investigation aron isumite ang iyang counter-affidavit batok sa reklamong gisang-at sa Philippine National Police Criminal Investigation and Detection Group (PNP-CIDG).

Naggikan ang kaso sa insidente niadtong Mayo 14, diin giingong gitabangan ni Padilla si Sen. Ronald “Bato” dela Rosa nga makalikay sa pagdakop. Niadtong higayona, misulay ang mga opisyal sa PNP-CIDG sa pagserbisyo sa warrant of arrest nga gipagawas sa International Criminal Court (ICC) batok kang Dela Rosa didto sa Senado, may kalabotan sa kampanya batok sa ilegal nga droga sa miaging administrasyon.

Gilimod ni Padilla ang mga alegasyon ug mipahayag nga nakisakay lamang si Dela Rosa sa iyang sakyanan samtang siya mibiya sa Senado. Gisaway usab niya ang reklamo ug gikuwestiyon nganong gisang-at ang lokal nga kaso tungod sa usa ka international warrant. Matod niya, dili patas ang pagtarget kaniya.

-Ato ni Bai