Misupak si Macron sa ‘Return Hubs’ Alang sa mga Migranteng Nagapaabot og Deportasyon

Mipahayag si French President Emmanuel Macron nga dili pabor ang France sa pagtukod sa gitawag nga “return hubs” alang sa mga migrante sa ikatulong mga nasod samtang nagpaabot sila sa deportasyon.

Gidudahan ni Macron ang pagkaepektibo sa maong sistema, apan iyang giingon nga gitahod niya ang mga nasod nga gustong magpatuman niini.

“Pabor kami sa mas epektibong polisiya sa pagpabalik sa mga migrante, apan wala pa ko makakita og return center sa ikatulong nasod nga tinuod nga epektibo,” matod ni Macron sa Brussels sa pagtapos sa duha ka adlaw nga summit sa European Union.

Giaprobahan sa European Parliament niining semanaha ang mga reporma sa polisiya sa migrasyon aron mapaspasan ang deportasyon sa mga migrante ug tugotan ang offshore detention centers.

Miingon ang mga kritiko nga ang maong lakang sobra ka istrikto ug makapaluya sa mga proteksyon alang sa mga nangayo og asylum.

Gipangutana ni Macron kung nahiuyon ba ang mga return hub sa mga prinsipyo ug mithi sa Europe.

“Dili ko sigurado nga mao kini ang gipasabot sa atong Europe. Dili ko sigurado nga mao kini ang mga batakang prinsipyo diin gitukod ang atong Europe, ug wala usab ko motuo nga epektibo kini,” matod niya.

Mipahayag usab si Spanish Prime Minister Pedro Sanchez human sa EU summit nga supak usab ang Spain sa maong mga return hub, bisan pa man nga minorya sila sa maong baruganan sulod sa Europe.

Miingon si Sanchez nga ang mga return hub “mag-usik lamang sa mga kapanguhaan sa ekonomiya,” ug nga limitado na daan ang mga maong kapanguhaan sa Europe.

-Ato ni Bai