Mga Subpoena Alang sa mga Saksi sa Giingong P612.5M Confidential Funds Gipagula sa Senado

Gimando sa Senate impeachment court niadtong Miyerkules ang pagpagawas og mga subpoena ngadto sa upat ka saksi nga gilaom motestigo sa mga alegasyon nga dili hustong paggamit ni Vice President Sara Duterte sa P612.5 milyon nga confidential funds.

Atol sa ikaunom nga adlaw sa impeachment trial, giaprobahan ni Presiding Officer Francis “Chiz” Escudero ang mga subpoena ad testificandum, nga nagmando sa mga saksi nga motunga ug motestigo, ingon man ang mga subpoena duces tecum nga nagmando kanila sa pagdala sa may kalabotang mga dokumento alang sa mga pagdungog nga gikatakda sa Hulyo 21 ug 22.

Ang gimandoang motunga mao sila si House Legislative Archives and Museum Management Service Director Marivic Pareja, kanhi Land Bank Shaw Boulevard branch manager Violeta Constantino, ug kanhi Land Bank Department of Education branch manager Nenita Camposano.

Giaprobahan usab sa impeachment court ang usa ka subpoena duces tecum alang kang Land Bank President ug Chief Executive Officer Lynette Ortiz, nga nagmando sa paghatag sa mga dokumentong may kalabotan sa maong mga pagdungog.

Gilaom nga motestigo ang mga saksi bahin sa Article I sa Articles of Impeachment, nga nagaakusar kang Duterte sa giingong sayop nga paggamit sa P500 milyon nga confidential funds sa Office of the Vice President ug P112.5 milyon nga gigahin alang sa Department of Education.

Gipahibalo usab ni lead House prosecutor Rep. Gerville Luistro sa korte nga si National Bureau of Investigation Director Melvin Matibag motestigo sa Martes, Hulyo 21, imbis sa Lunes, Hulyo 20.

Miabot ang maong kausaban sa iskedyul human nakahukom ang mga senator-judge nga isibog hangtod Lunes ang desisyon sa hangyo sa prosekusyon nga magpagawas og subpoena alang sa bank records ug tax records sa Bise Presidente, ingon man sa iyang bana nga si Manases Carpio.

Gilaom nga si Matibag mahimong kataposang saksi sa prosekusyon alang sa Article IV, nga naghisgot sa mga alegasyon nga si Duterte naghimo og grave threats ug nalambigit sa giingong assassination plot batok kang Presidente Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.

Sayo pa niini, gipamub-an usab sa House prosecution panel ang listahan sa ilang mga saksi alang sa Article IV, nga nag-ingon nga igo na ang mga ebidensyang ilang napresentar aron suportahan ang maong bahin sa ilang kaso.

-Ato ni Bai