Mga Senador: Mga Bayani Angay Pasidunggan Pinaagi sa Matinud-anong Pagserbisyo

Miingon niadtong Lunes sila Senate President Sherwin Gatchalian ug Senator Francis Pangilinan nga ang mga sakripisyo sa mga bayani sa Pilipinas angay pasidunggan pinaagi sa matinud-anong pagserbisyo sa publiko ug yano nga mga buhat sa kaisog taliwala sa mga hagit karon.

Gisaulog sa nasod ang National Heroes Day sa Agosto 31, usa ka regular holiday ubos sa Proclamation No. 1006 nga gipagawas ni President Ferdinand R. Marcos Jr.

Miingon si Gatchalian nga ang paghinumdom sa mga nakigbisog alang sa kagawasan, soberanya, ug demokrasya sa nasod kinahanglan usab nga magdasig sa mga Pilipino nga ipadayon ang pagtukod og mas maayong nasod.

“Magiging mas makabuluhan ang sakripisyo ng ating mga bayani kung bawat isa sa atin ay maglilingkod sa pamilya, komunidad, at bayan nang may integridad, katapatan, at malasakit,” matod ni Gatchalian sa usa ka pahayag.

“Sa gitna ng mga problemang kinakaharap ng bansa — tulad ng pagbaha, korapsyon sa gobyerno, mga hamon sa kalidad ng edukasyon, at mataas na presyo ng pagkain at kuryente — sama-sama nating pangalagaan ang kaban ng bayan at tiyaking bawat programa ng pamahalaan ay maayos, tapat, at tunay na nagsisilbi sa bawat pamilyang Pilipino,” matod niya.

Samtang, miingon si Pangilinan nga ang pagkabayani dili lamang alang sa mga iladong personalidad nga makita sa mga libro sa kasaysayan, ug iyang gipasiugda ang ordinaryong mga Pilipino nga nagsakripisyo alang sa ilang pamilya, komunidad, ug nasod.

Iyang gihisgutan ang overseas Filipino workers ug ubang mga ginikanan, mga tigpanalipod sa kinaiyahan, mga mag-uuma ug mangingisda, ingon man ang mga tawo nga mosulti sa kamatuoran ug mga testigo nga nanindigan alang sa accountability bisan pa sa mga hulga o pagsulay sa pagsuhol kanila.

“‘Yan ang bayaning Pilipino: Hindi nagpapasiil sa hamon ng buhay,” matod ni Pangilinan.

Gihatagan usab niya og pag-ila ang mga silingan, rider, social worker, health professional, ug disaster-response volunteer nga misukol sa baha atol sa sunod-sunod nga pag-ulan sa milabay nga mga semana aron maghatod og pagkaon, tambal, ug uban pang tabang.

Sa mensahe usab ni President Marcos alang sa National Heroes Day niadtong Lunes, miingon siya nga ang mga Pilipino kinahanglan mopasidungog dili lamang sa mga personalidad sa kasaysayan kondili usab sa mga tawo nga padayon nga nagserbisyo sa nasod sa ilang adlaw-adlaw nga kinabuhi. -Ato ni Bai