Mga pahayag ni VP Duterte, tubag ra sa pangutana ug dili hulga — depensa

Gipadayon sa depensa ni Vice President Sara Duterte niadtong Martes ang ilang baruganan nga ang kontrobersiyal niyang mga pahayag bahin sa iyang giingong pakigsabot sa usa ka tawo aron patyon si President Ferdinand “Bongbong” Marcos Jr. mga tubag lamang sa usa ka pangutana atol sa press conference ug dili angay hubaron nga hulga.

Atol sa ikalimang adlaw sa impeachment trial ni Duterte, gipadayon ni defense lawyer Mark Vinluan ang iyang cross-examination kang National Bureau of Investigation (NBI) Regional Director for the Bangsamoro Autonomous Region in Muslim Mindanao (BARMM) Jeremy Lotoc, ang ikaduhang saksi sa House prosecution.

Si Lotoc kaniadto maoy nangulo sa NBI Cybercrime Division nga nag-imbestigar sa online press conference ni Duterte niadtong Nobyembre 2024 diin miingon siya nga nakakontrata siya og usa ka tawo aron patyon sila Marcos, First Lady Liza Araneta-Marcos, ug kanhi House Speaker Martin Romualdez kon siya mismo ang mapatay.

Mipahayag si Vinluan nga ang mga gisulti ni Duterte gihimo lamang isip tubag sa usa ka pangutana ug dili mahimong isipon nga hulga.

“Baruganan namo nga ang mga pahayag sa Bise Presidente dili hulga sa sinugdanan pa lang. Mao nga among giklasipikar kini isip yano nga tubag sa usa ka question-and-answer,” matod niya.

“Wala gayod kini direktang gitumong ngadto sa Presidente, First Lady, ug kanhing Speaker. Sa laing pagkasulti, kon wala nila tan-awa ang video, dili sila makahibalo niini. Busa, wala gayoy hulga sa sinugdanan pa lang ug bisan ang paghisgot sa mga elemento niini dili magamit sa pagtino sa pagka-inosente o pagkasad-an sa Bise Presidente,” dugang ni Vinluan.

Gipangutana usab sa defense lawyer si Lotoc kon ang grave threats ug inciting to sedition ba mga felony ug kon ang maong mga sala mahimong ikonsiderang impeachable acts.

Mitubag si Lotoc nga ang pagtino kon ang giingong mga buhat mahimong betrayal of public trust sakop sa awtoridad sa impeachment court.

“Kon ang imong pasabot mao ang impeachable offenses, kon mahimong ma-qualify ba kini isip betrayal of public trust, naa na kana sa paghusga sa mga judge, Your Honor. Wala na kana sa amo,” matod ni Lotoc.

-Ato ni Bai