Mga kandidato gikan sa 5 ka nasod, nagtinguha nga mangulo sa WHO

Midugang ang ikalimang kandidato sa lumba alang sa pagpangulo sa World Health Organization (WHO), sumala sa website sa ahensiya, human matapos ang deadline sa nominasyon kagabii.

Miapil si Maria Neira sa Spain sa kataposang adlaw sa pagsumite sa mga nominasyon niadtong Setyembre 24, sumala sa website sa WHO.

Nagsumite og aplikasyon ang mga kandidato gikan sa lima ka nasod aron mopuli kang Tedros Adhanom Ghebreyesus sa Ethiopia isip director-general sa WHO.

Sila mao si Hanan Mohammed Al-Kuwari sa Qatar, Hanan Balkhy sa Saudi Arabia, Hans Kluge sa Belgium, Maria Neira sa Spain, ug Budi Gunadi Sadikin sa Indonesia.

Si Al-Kuwari kanhi health minister; si Balkhy usa ka doktor nga nangulo sa Eastern Mediterranean office sa WHO; si Kluge usa ka doktor ug regional director sa WHO alang sa Europe; si Neira usa ka doktor, epidemiologist, ug kanhi director sa WHO; samtang si Budi mao ang health minister sa Indonesia.

Ipahigayon ang candidates' forum sa Nobyembre, samtang ang Executive Board sa WHO mopili og hangtod tulo ka kandidato sa Enero 2027.

Nangulo si Tedros sa WHO sukad 2017, diin iyang gidumala ang pagtubag sa ahensiya sa COVID-19 pandemic ug uban pang mga outbreak, lakip ang Ebola ug mpox.

Atol sa iyang pagpangulo, nawad-an ang WHO sa kinadak-ang donor niini human gimando sa Estados Unidos ang pag-atras gikan sa organisasyon niadtong 2025. Giakusahan ni President Donald Trump ang WHO nga wala hustong pagdumala sa COVID-19, apan gipanghimakak kini sa organisasyon.

-Ato ni Bai