Mga Akusasyon Batok Kang Karim Khan Gisubli sa ICC Junior Lawyer sa TV Interview

Gisubli sa usa ka junior lawyer sa International Criminal Court (ICC) niadtong Huwebes ang iyang mga akusasyon nga si Prosecutor Karim Khan nakighilawas kaniya pinaagi sa dili boluntaryong sexual contact, atol sa iyang unang interbyu sa media uban sa CNN.

Gibalibaran ni Khan, 56 anyos, ang mga akusasyon. Si Sareta Ashraph, ang iyang abogado, miingon sa CNN nga gilimod ni Khan ang “bisan unsang matang sa sexual contact, relasyon, consensual man o non-consensual” uban sa maong babaye. Wala dayon motubag ang legal team ni Khan sa hangyo sa Reuters alang sa komento.

Ang babaye, nga giila lamang sa ngalang Sarah, midumili sa paghisgot sa nagpadayon nga imbestigasyon sa ICC batok kang Khan apan miingon nga nagkaanam og grabe ang iyang pamatasan, lakip ang dili gustong paghikap ug pagkapkap. Gihinumdoman usab niya ang usa ka hitabo diin iyang giingong gihikap siya ni Khan sa sensitibong bahin sa lawas samtang nagpakaaron-ingnon siyang natulog.

“Walay paagi nga mahimong consensual ang usa ka butang kung adunay ingon niana kadako nga kalainan sa gahum,” matod ni Sarah sa CNN.

Base sa mga dokumentong gisusi sa Reuters, nakahinapos ang mga diplomat nga nagdumala sa ICC nga si Khan adunay dili angay nga sexual relationship uban sa usa ka junior staff member ug mirekomendar nga tangtangon siya sa iyang posisyon. Gikatakdang mobotar sa Hulyo 24 ang 125 ka member states sa korte sa usa ka proposal nga papahawaon si Khan tungod sa giingong sexual misconduct.

Nag-ingon ang mga nagsuporta kang Khan nga nahimo siyang target sa politika human sa iyang desisyon niadtong 2024 nga mangayo og arrest warrants batok sa mga opisyal sa Israel tungod sa gubat sa Gaza.

Atol sa interbyu, gilimod usab ni Sarah ang mga alegasyon nga mikaylap online nga nagtrabaho siya alang sa intelligence agency sa Israel nga Mossad. Miingon siya nga miagi siya og hugot nga security screening sa wala pa siya gitugotan nga makatrabaho pag-ayo uban kang Khan ug sa iyang gisundan sa posisyon.

“Kung adunay bisan gamayng pagduda nga usa ko ka state agent sa bisan unsang matang, gitangtang na unta ko sa trabaho,” matod niya.

-Ato ni Bai