Medical Report sa PGH kang Sen. Marcoleta Gidayeg ni Sen. Lacson

Gidayeg ni Senador Panfilo “Ping” Lacson niadtong Huwebes ang University of the Philippines-Philippine General Hospital (UP-PGH) tungod sa iyang gihulagway nga walay pinili nga medical assessment nga mitultol sa pagbalhin kang Sen. Rodante Marcoleta gikan sa hospital detention ngadto sa prisohan.

Gimando sa Sandiganbayan ang UP-PGH nga mohimo og independent medical examination aron masuta kung gikinahanglan pa bang magpabilin si Marcoleta sa Philippine National Police General Hospital (PNPGH), diin siya nagpabilin sukad sa iyang pagdakop.

Human makaplagan sa mga doktor sa PGH nga wala siyay medikal nga kondisyon nga nagkinahanglan og padayon nga pagpahigda sa ospital, gimando sa anti-graft court ang iyang pagbalhin ngadto sa New Quezon City Jail Male Dormitory sa Barangay Payatas.

Sa iyang reaksyon, gipangutana ni Lacson ang dayag nga pag-ayo sa kahimtang sa senador human niya kining nakita nga migawas sa Sandiganbayan.

“Usa kini ka milagro! Naka-wheelchair pagsulod, kusog ang paglakaw paggawas. Kudos to UP-PGH for putting professionalism and integrity above all other considerations in submitting their medical report to the Sandiganbayan,” matod ni Lacson sa iyang post sa X.

Gidakop si Marcoleta niadtong Hulyo 6 human mogawas ang warrant of arrest gikan sa Sandiganbayan batok kaniya ug sa tulo pa ka kaubanan may kalabotan sa mga kasong plunder ug graft nga naglambigit sa giingong P75 milyon nga campaign donation nga matod sa prosekusyon wala niya ideklarar sa dihang nagsilbi pa siya isip party-list representative.

Imbis nga dad-on dayon sa detention facility, gidawat si Marcoleta sa PNPGH human siya mireklamo og kasakit sa dughan ug hypertension. Atol sa iyang pagpabilin didto, gi-diagnose usab siya sa mga doktor nga adunay mild pneumonia ug gikatahong gibisita siya ni Vice President Sara Duterte ug Sen. Robinhood Padilla.

Human sa independent evaluation, gikompirmar sa mga doktor sa PGH nga wala nay mild pneumonia si Marcoleta, samtang gi-certify usab sa PNPGH nga andam na siya makabiyahe.

Base sa maong mga resulta, gimando ni Sandiganbayan Third Division Chairperson Associate Justice Karl Miranda ang pagbalhin sa senador ngadto sa prisohan.

“Tungod sa mga findings sa PGH ug sa Philippine National Police General Hospital, gimando sa korte ang pagbalhin kang Marcoleta ngadto sa Quezon City Jail Male Dormitory,” matod ni Miranda sa iyang order.

Natapos pinaagi sa maong pagbalhin ang siyam ka adlaw nga pagpabilin ni Marcoleta sa ospital ubos sa pagdakop.

-Ato ni Bai