Marcos Naglaom sa Mas Lig-on nga Relasyon sa Switzerland ug Netherlands

Mipahayag si President Ferdinand R. Marcos Jr. niadtong Huwebes og paglaom nga mas molig-on pa ang relasyon sa Pilipinas sa Switzerland ug Netherlands ubos sa ilang bag-ong gitudlo nga mga ambassador.

Gidawat ni Marcos ang credentials ni Swiss Ambassador to the Philippines Edgard Cristoph Doerig ug Dutch Ambassador Roderick Wols sa managlahing seremonya sa Malacañan Palace sa Manila.

Atol sa presentation of credentials, gihulagway ni Marcos ang relasyon sa Pilipinas ug Switzerland nga “warm and close,” nga nakabase sa ilang managsamang mga prinsipyo.

Mipahayag si Marcos og pagsalig nga mas mapalig-on pa sa duha ka nasod ang ilang relasyon atol sa termino ni Doerig.

“I am sure that the time that you will spend here in the Philippines will bring our countries even closer than we already are, and I look forward to working together,” matod niya sa bag-ong Swiss ambassador.

Giila ni Doerig ang dugay nang politikal ug ekonomikanhong relasyon tali sa Pilipinas ug Switzerland, ingon man ang makasaysayang kalambigitan sa duha ka nasod.

Gihisgotan niya ang pagpuyo sa national hero nga si Jose Rizal sa Switzerland, diin gihubad ni Rizal ngadto sa Tagalog ang “William Tell” ni Friedrich Schiller, nga nakatabang sa pagpaila sa mga Pilipino sa mga konsepto sa kagawasan, civic responsibility ug self-determination.

Matod niya, ang pagsaulog sa Pilipinas ug Switzerland sa 70 ka tuig nga diplomatic relations sa 2027 mahimong oportunidad aron mas mapalalom pa ang bilateral cooperation.

Samtang, parehong mipahayag si Marcos ug Wols og pagsalig sa kalig-on sa bilateral relations sa Pilipinas ug Netherlands, nga nakabase sa ilang managsamang maritime heritage ug mga prinsipyo sa demokrasya, human rights ug rule of law.

Gipasiugda ni Marcos ang lig-on nga economic partnership sa duha ka nasod ug ang posibilidad nga mapalapad ang kooperasyon sa trade ug investment, water management, transportation ug infrastructure.

Gipasiugda ni Wols ang lig-on nga pundasyon sa 75 ka tuig nga relasyon sa Pilipinas ug Netherlands ug gisubli ang pasalig sa Netherlands sa international legal order, malinawong pagsulbad sa mga lalis, rule of law ug pagpanalipod sa human rights ug kagawasan.

Giila usab nila Marcos ug Wols ang lig-on nga people-to-people ties tali sa Pilipinas ug Netherlands, ilabina ang kontribusyon sa mga Pilipino sa katilingban ug ekonomiya sa Netherlands, lakip ang mga nagtrabaho sakay sa Dutch-flagged vessels.

Usa ka career diplomat si Wols nga kaniadto nagserbisyo sa China, Brazil, Japan, Iran, Saudi Arabia ug Angola.

-Ato ni Bai