Marcos Nagkonsiderar og Absolute Pardon kang Mary Jane Veloso

Gikonsiderar ni President Ferdinand R. Marcos Jr. ang paghatag og absolute pardon kang Mary Jane Veloso tungod sa humanitarian grounds, matod sa Malacañang niadtong Miyerkules.

Gikumpirma ni Palace Press Officer Claire Castro ang maong kalamboan human miingon si Bataan Rep. Albert Garcia atol sa deliberasyon sa gisugyot nga 2027 budget sa Office of the President nga “seriously considering” ang Malacañang sa paghatag kang Veloso og absolute pardon.

Matod ni Castro, gibase ang maong konsiderasyon sa humanitarian grounds.

Sa dihang gipangutana kung mahimong mahatag ang pardon sa dili pa ang Pasko, matod ni Castro nga mahimong mas sayo kini, apan wala siya mohatag og tukmang panahon.

“Baka mas maaga. Let us see. Hayaan natin ang Pangulo magsalita,” matod niya atol sa Palace briefing.

Una nang miingon si Garcia nga mahimong adunay pahibalo bahin niini sa umaabot nga mga adlaw.

Si Veloso, kanhi overseas Filipino worker, nakonbikto sa drug trafficking ug gihukman og kamatayon sa Indonesia niadtong 2010. Hapit 15 ka tuig siyang napriso sa Indonesia sa wala pa siya gipabalik sa Pilipinas niadtong Disyembre 2024 human sa usa ka kasabutan tali sa Manila ug Jakarta.

Karon detinado si Veloso sa Correctional Institution for Women sa Mandaluyong.

Matod ni Castro, dili kinahanglan nga mangayo og pagtugot ang gobyerno sa Pilipinas gikan sa Indonesia alang sa posibleng paghatag og pardon.

Ang posibleng pardon nagsunod sa nangaging mga hangyo ni Veloso ug sa iyang pamilya alang sa executive clemency. Niadtong Hulyo, miingon ang Malacañang nga ipaabot kang Marcos ang hangyo aron iyang makonsiderar.

Niadtong Disyembre 2024, matod ni Marcos nga ang hangyo alang sa clemency ipaubos sa pagrepaso sa mga legal expert sa gobyerno.

-Ato ni Bai