Malacañang Miingon Pagsaka sa Plete Kinahanglang ‘Last Resort’ Tali sa Mahal nga Krudo

Naglaum ang gobyerno nga malikayan ang pagsaka sa plete sa pampublikong transportasyon ug himoon lamang kini nga “last resort” samtang padayon nga naghatag og tabang sa mga trabahante sa transportasyon tali sa pagsaka sa presyo sa krudo, matod sa Malacañang niadtong Martes.

Miingon si Palace Press Officer Claire Castro nga prayoridad sa administrasyon ang pagsuporta sa mga drayber ug ubang trabahante sa transportasyon nga dili ipasa sa mga pasahero ang dugang nga palas-anon.

“Sana po ‘yun ang magiging last resort. ‘Yun ang panalangin,” matod ni Castro, nga nagtumong sa mga proposal sa pagsaka sa plete.

“Hindi po kasi sa ngayon inclined talaga na magtaas ng pamasahe para sa ating mga kababayan, pero hindi po naman sinasara ang pintuan patungkol po dito,” dugang niya.

Matod ni Castro, padayon nga gitimbang-timbang sa gobyerno ang kahimtang ug gitino ang mga lakang nga makatabang sa sektor sa transportasyon samtang malikayan ang dugang nga pinansyal nga palas-anon sa mga pasahero.

Miingon siya nga gikinahanglan una ang usa ka rekomendasyon sa dili pa makadesisyon si President Ferdinand R. Marcos Jr. sa bisan unsang pag-usab sa plete.

“Hangga’t kakayanin lang po na ibigay muna ang tulong sa ating mga tsuper sa transport sector nang hindi tataas ang pamasahe, ‘yun po muna ang ginagawa ng administrasyon,” matod ni Castro.

Samtang, miingon si Castro nga dili mapugngan sa gobyerno ang mga transport group sa pagpahigayon sa ilang planong welga, sa dihang gipangutana bahin sa duha ka adlaw nga transport strike sa Pagkakaisa ng mga Samahang Tsuper at Operator Nationwide sa Setyembre 29 ug 30.

Nanawagan ang mga transport group kang Marcos nga tugotan ang patas ug mapadayonong pag-usab sa plete, tungod sa mas taas nga gasto sa operasyon dala sa mahal nga presyo sa krudo ug pagbayad sa modernization loans.

Gilauman nga isumite sa Land Transportation Franchising and Regulatory Board (LTFRB) ngadto sa Department of Transportation sa Oktubre ang rekomendasyon niini bahin sa pending nga mga petisyon sa pag-usab sa plete.

Sa paghimo sa rekomendasyon, ikonsiderar sa LTFRB ang kapasidad sa mga pasahero sa pag-abaga sa mas taas nga plete, tabang sa gobyerno ngadto sa mga trabahante sa transportasyon, ug posibleng epekto sa pagsaka sa plete sa inflation.

-Ato ni Bai