Makati court nagpagawas og arrest warrant batok kang Rep. Leandro Leviste

Nagpagawas og arrest warrant batok kang Batangas 1st District Representative Leandro Antonio Legarda Leviste tungod sa giingong mga paglapas sa Public Service Act.

Gipagawas sa Regional Trial Court (RTC) Branch 235 sa Makati City ang warrant niadtong Oktubre 5, nga gi-docket isip Criminal Case No. R-MKT-26-02226-CR (A).

Gimando sa warrant ang law enforcement officers nga dakpon ang kongresista—nga giingong makit-an sa Paraiso, Calatagan, Batangas, o bisan asa—ug dad-on siya atubangan sa korte aron atubangon ang mga kaso ubos sa Section 25 sa Commonwealth Act No. 146, nga gi-amend sa Republic Act No. 11659 (the Public Service Act).

Gitakda sa ₱72,000 ang piyansa alang sa temporaryong kagawasan ni Leviste.

Gimando usab sa warrant nga ang mga opisyal nga mopatuman niini kinahanglang mogamit og labing menos usa ka body-worn camera ug usa ka alternative recording device, o labing menos duha ka recording devices, subay sa Supreme Court guidelines ubos sa A.M. No. 21-06-08-SC.

Si Leviste, nga anaa karon sa France, nag-atubang og mas hugot nga pagsusi human sa mga imbestigasyon sa Office of the Ombudsman ug Department of Energy nga naglambigit sa renewable energy contracts ug solar project commitments nga konektado sa iyang business operations.

Una nang gipahayag sa iyang kampo nga anaa siya sa France aron mouban sa iyang inahan nga si Sen. Loren Legarda, nga nagpailalom sa medical treatment.

-Ato ni Bai