Lacson walay nakitang isyu sa pagbiyahe ni Cayetano sa Singapore

Gipakamenos ni Senador Panfilo “Ping” Lacson niadtong Huwebes ang bag-ohay nga pagbiyahe sa gawas sa nasod ni Senate Minority Leader Alan Peter Cayetano, nga miingong wala pay rason sa pagkakaron nga himuong isyu kini bisan nag-atubang ang senador og nagkadaghang imbestigasyon sa gobyerno sa giingong mga iregularidad.

Miingon si Lacson nga angay hatagan og higayon si Cayetano nga makapahulay gikan sa tensiyon tungod sa mga kontrobersiya nga iyang giatubang. Nanghinaut usab siya nga maayo ang kahimtang ni Cayetano ug sa iyang asawa nga si Taguig City Mayor Lani Cayetano, tungod kay posibleng may kalabotan sa panglawas ang ilang biyahe.

“This is not an issue as of the moment. Let’s let them take a break from the stress caused by issues that he himself created,” matod ni Lacson sa usa ka post sa X (kaniadto Twitter). “For all we know, Sen. Alan and his wife’s trip has something to do with reproductive health, which Singapore is known for. If it is simply health-related, I sincerely wish him well despite our animosities.”

Mikaylap online niadtong Miyerkules sa gabii ang mga hulagway nga nagpakita kang Cayetano nga nagpila alang sa Singapore Airlines flight sa Ninoy Aquino International Airport Terminal 3.

Giimbestigahan karon si Cayetano sa National Bureau of Investigation ug Office of the Ombudsman tungod sa giingong graft ug mga iregularidad sa pag-host sa Pilipinas sa 2019 Southeast Asian (SEA) Games, diin nagsilbi siyang chairman sa Philippine SEA Games Organizing Committee (Phisgoc).

Gisusi usab ang senador tungod sa giingong mga anomalya sa flood control infrastructure projects sa Taguig City, nga giisip nga political stronghold sa iyang pamilya.

Bag-ohay lang gisumite sa opisina ni Lacson ngadto sa Office of the Ombudsman ang labing menos 45 ka case studies nga gisuportahan sa mga opisyal nga dokumento ug nagdetalye sa giingong “systemic anomalies” sa flood control projects sa Taguig, nga maoy hinungdan sa paglunsad sa Ombudsman og fact-finding probe.

Padayon nga nanawagan si Lacson nga manubag ang bisan kinsa nga mapamatud-ang responsable sa sayop nga paggamit sa pondo sa gobyerno nga may kalabotan sa mga proyekto. -Ato ni Bai