Kanhi Information Officer ni VP Duterte: ‘The Dutertes have no reason to cause me any harm’

Misumite og affidavit ngadto sa National Bureau of Investigation (NBI) niadtong Huwebes si Jefry Tupas, kanhi information officer ni Vice President Sara Duterte, diin hugot niyang gipanghimakak ang mga alegasyon ni dismissed policeman Rodulfo Gracioso Jr.

Gikumpirma ni Tupas sa usa ka pahayag nga may petsang Oktubre 1 nga ang iyang abogado nga si Atty. Toby Diokno maoy naghatod sa affidavit ngadto sa NBI headquarters sa Manila.

Gisumite ang affidavit human gipadalhan sa NBI si Tupas og subpoena nga nagmando kaniya sa pag-atubang kang NBI Director Melvin Matibag niadtong Oktubre 1 kalabot sa imbestigasyon sa posibleng paglapas sa Anti-Plunder Act (RA 7080), Anti-Graft and Corrupt Practices Act (RA 3019), ug Anti-Money Laundering Act (RA 9160).

Gibutyag ni Tupas nga sa wala pa niya madawat ang subpoena, mibisita sa iyang pinuy-anan sayo sa buntag niadtong Setyembre 29 ang mga kawani sa NBI nga nagpaila nga mga sakop sa Special Assistant for Mindanao Concerns office.

Gipahibalo siya nga nakamatikod ang ahensya og “verifiable threat” batok sa iyang kinabuhi.

Bisan gitanyagan siya ug ang iyang pamilya sa NBI og proteksyon sa seguridad, mibalibad si Tupas.

Matod ni Tupas, personal siyang gitawagan ni Matibag aron hisgutan ang kahimtang sa iyang seguridad ug gihangyo nga makigkita sa Manila.

“I explicitly requested that the NBI send me a formal invitation instead,” matod ni Tupas.

Apan matod ni Tupas, imbis imbitasyon bahin sa iyang seguridad, gipadalhan siya sa ahensya og subpoena nga may petsang Setyembre 28 nga nagmando kaniya sa paghatag og testimonya kalabot sa mga imbestigasyon sa graft, plunder, ug money laundering.

Kabahin sa affidavit ni Gracioso nga gipagawas sa publiko, gitawag ni Tupas ang mga alegasyon nga “farcical” ug “deeply outrageous,” ug miingon nga dali kining mapamatud-ang sayop pinaagi sa mga kamatuoran. Partikular niyang gipanghimakak ang mga alegasyon nga hulga sa iyang kinabuhi ang Bise Presidente o ang pamilya niini.

“I am confident that the Dutertes have no reason to cause me any harm,” matod ni Tupas.

Bisan pa niini, giila ni Tupas nga nagkadako ang iyang kabalaka alang sa kaluwasan sa iyang pamilya human sa mga taho bahin sa giingong hulga. Gibutyag niya nga adunay mga kadudahang tawo nga namatikdan duol sa mga pinuy-anan ug trabahoan sa iyang pamilya, nga kasamtangang gidokumento sa iyang legal team.

“I am now a private citizen, and my only wish is to be spared from being used as a pawn, tool, or leverage in schemes to persecute Ms. Sara Z. Duterte and the Duterte family,” matod ni Tupas. “I hope that I will be allowed to live a quiet and simple life—away from the chaos of politics.” -Ato ni Bai