Kamara target aprobahan ang 2027 national budget sa Oktubre 9

Target sa House of Representatives nga maaprobahan sa third reading ang gisugyot nga 2027 national budget sa Oktubre 9, matod ni House Committee on Appropriations vice chair Romeo Momo Sr. niadtong Miyerkules.

Gisulti ni Momo sa usa ka press briefing nga nahuman sa komite niadtong Martes ang kataposang budget hearing, busa mahimo nang sugdan sa sunod semana ang plenary deliberations sa gisugyot nga budget.

“Before we start, we are pleased to report that the House Committee on Appropriations has completed the budget deliberations on schedule. The last budget hearing concluded as planned yesterday,” matod ni Momo.

“We are slated to begin plenary deliberation next week, and we remain on track to approve the House General Appropriations Bill, or GAB, on the third reading by the end of the legislative calendar on Oct. 9,” matod sa Surigao del Sur lawmaker.

Gipaningkamotan sa Kamara nga masunod ang iskedyul sa deliberasyon sa gisugyot nga 2027 national budget ubos sa pagpangulo ni Speaker Faustino Dy III, samtang nangandam ang mga mambabalaod alang sa mas detalyadong pagrepaso niini sa plenaryo.

Ang press briefing niadtong Miyerkules mao usab ang una sa serye sa mga briefing nga gimando ni Dy aron kanunay nga mahibaloan sa publiko ang mga kalamboan sa budget deliberations.

Gibahin sa tulo ka grupo ang mga briefing nga naglangkob sa infrastructure, education, ug social services.

Kauban ni Momo, nga chairman usab sa House Committee on Public Works and Highways, sa infrastructure briefing sila House Appropriations Vice Chairs Reps. Reynante Arrogancia sa Quezon ug Irene Labadlabad sa Zamboanga del Norte.

Sunod nga ipahigayon ang laing mga briefing bahin sa education ug social services.

-Ato Ni Bai