top of page
Bai (150 x 150 px) (100 x 100 px).png

Iran ug Qatar Nagpadayon sa Pakigpulong Aron Matapos ang Gubat sa US ug Israel

Mipadayon sa ikatulong sunodsunod nga adlaw ang mga negosyador sa Iran sa ilang pakigpulong sa mga tigpataliwala sa Qatar didto sa Doha niadtong Domingo, aron makab-ot ang kasabotan nga motapos sa gubat sa US ug Israel batok sa Iran, sumala sa usa ka opisyal nga adunay kahibalo sa mga panaghisgot nga nakigsulti sa Reuters.

Reuters; Gihubad ni Alex Destor, /Ato ni Bai

November 2, 2026 at 5:55:08 AM

US Secretary of State Marco Rubio speaks at a G20 press conference.

US Secretary of State Marco Rubio hosts a press conference on the sidelines of the G20 foreign ministers' meeting in Atlanta, Georgia, US, October 31, 2026.

Reuters / Megan Varner

Mipadayon sa ikatulong sunodsunod nga adlaw ang mga negosyador sa Iran sa ilang pakigpulong sa mga tigpataliwala sa Qatar didto sa Doha niadtong Domingo, aron makab-ot ang kasabotan nga motapos sa gubat sa US ug Israel batok sa Iran, sumala sa usa ka opisyal nga adunay kahibalo sa mga panaghisgot nga nakigsulti sa Reuters.


Gipahigayon ang mga panaghisgot taliwala sa kabalaka nga posibleng mosamot pag-usab ang panagbangi human sa US midterm elections sa Nobyembre 3.


Mipahayag si President Donald Trump nga dili maglunsad ang United States og bag-ong mga pag-atake batok sa Iran sa wala pa ang botohan ug positibo ang dagan sa pakigpulong sa Tehran. Apan wala niya isalikway ang posibilidad sa dugang aksyong militar human sa eleksyon.


Balik-balik nga mipahayag ang Iran nga motubag kini sa bisan unsang bag-ong pag-atake pinaagi sa pagtarget sa mga pasilidad sa US ug Israel sa mga kasikbit nga nasod, samtang ang walo na ka bulan nga gubat nagpadayon sa pagsamok sa suplay sa krudo sa tibuok kalibotan ug mikaylap sa ubang bahin sa Middle East.


Nagpagawas og pahayag si Iran's Supreme Leader Ayatollah Mojtaba Khamenei niadtong Sabado nga nagmando sa ilang armadong kusog nga mangandam sa pagtubag sa bisan unsang pag-atake. Sa ulahi, gipahibalo sa militar sa Iran nga naghimo na kini og mga lakang aron mapalig-on ang ilang pagpangandam.


Mipahayag si US Secretary of State Marco Rubio niadtong Sabado nga wala pa makahukom si Trump kon maglunsad ba og bag-ong mga pag-atake batok sa Iran, apan mas gusto niyang masulbad ang panagbangi pinaagi sa diplomasya.


Didto sa Tehran ang mga tigpataliwala sa Qatar niadtong Biyernes aron makighisgot sa mga opisyal sa Iran sa wala pa gibalhin ang mga panaghisgot ngadto sa Doha niadtong Sabado, sumala sa usa ka opisyal nga nakigsulti sa Reuters. Gidugang sa opisyal nga ang mga panaghisgot gikoordinar pinaagi sa regular nga komunikasyon sa Washington. -Reuters; Gihubad ni Alex Destor, /Ato ni Bai

bottom of page