Iran Miingong Kulang ang Tubag sa US sa Pag-abli sa Strait of Hormuz

Gihulagway sa Iran nga "insufficient" o kulang ang tubag sa United States sa pito ka kondisyon nga ilang gisugyot aron maablihan pag-usab ang Strait of Hormuz, matod ni Iranian security chief Mohsen Rezaei nga gikutlo sa state media niadtong Domingo.

Gipresentar sa Iran ang proposisyon atol sa UN General Assembly, diin mahimo nang ablihan pag-usab ang Strait of Hormuz ug mabalik ang normal nga pag-agi sa mga barko sulod sa pito ka adlaw kung matuman ang mga kondisyon. Mitubag ang US sa maong proposisyon pinaagi sa mga tigpataliwala gikan sa Qatar.

Matod ni Rezaei, Secretary sa Supreme National Security Council, kinahanglan pang klarohon sa Washington ang mga isyu nga wala pa masabti sa Tehran. Dugang niya, "we presented seven conditions to the Americans and clearly stated that the Strait of Hormuz would not be opened to them, and no negotiations would take place, until these conditions are met."

Wala dayong mitubag ang White House sa hangyo sa Reuters alang sa komentaryo.

Miingon si Rezaei nga ang Iran "no longer in the process of responding to the Americans".

"In their response, they have accepted some of our conditions, while others remain unclear," dugang niya.

Sa ulahing bahin sa Setyembre, gipahibalo sa Tehran nga nakadawat kini og tubag gikan sa US sa ilang labing bag-ong proposisyon aron ibalik ang napakyas nga ceasefire sa Gulf. Nahitabo kini pipila ka adlaw human miingon si US President Donald Trump nga iyang gisalikway ang maong proposisyon.

Nagpadayon ang Qatar ug ubang mga tigpataliwala sa paghatod og mga mensahe tali sa Washington ug Tehran aron matapos ang panagbangi ug maablihan pag-usab ang Strait of Hormuz. Sa wala pa ang gubat nga nagsugod sa ulahing bahin sa Pebrero pinaagi sa mga pag-atake sa US ug Israel batok sa Iran, ang maong agianan gigamit sa pagtransportar sa ikalima nga bahin sa suplay sa krudo ug liquefied natural gas sa tibuok kalibotan. -Ato ni Bai