Indigency gustong palapdan ni Escudero aron mas daghan makadawat og ayuda

Giduso ni Senate President Francis “Chiz” Escudero ang pagpalapad sa depinisyon sa indigency sa Pilipinas, tungod kay daghang Pilipino nga kalit maatubang og bug-at nga gasto ang dili makadawat og ayuda sa gobyerno ubos sa kasamtangang mga lagda.

Sa iyang podcast nga “Chiz Wiz! Usapang May Laman” niaging weekend, miingon si Escudero nga kasagarang gihigot ang government assistance sa pagka-benepisyaryo sa Pantawid Pamilyang Pilipino Program (4Ps). Tungod niini, mahimong dili maapil ang mga pamilyang labaw sa opisyal nga poverty threshold ang kita apan dili makaya ang dagkong gasto sa pagpamedikal o legal nga kaso.

Gipunting usab niya nga walay usa ka parehas nga depinisyon sa indigency nga gigamit sa tanang ahensya sa gobyerno. Ang mga barangay nagpagawas og certificate of indigency ubos sa Local Government Code, ang Public Attorney’s Office (PAO) naggamit sa income metrics sa Philippine Statistics Authority (PSA), samtang adunay kaugalingong sistema ang Department of Social Welfare and Development (DSWD).

“Indigency, therefore, should also be defined by circumstance, and not just income,” matod ni Escudero.

Gisugyot niya nga adunay mga klasipikasyon base sa kahimtang, sama sa “cancer-indigent” o “litigation-indigent.” Pinaagi niini, bisan ang mga middle-income earner sama sa mga magtutudlo mahimong makadawat og tabang sa gobyerno kon ang ilang gasto dili na makaya sa ilang pinansyal nga kapasidad.

“Ano ba talaga ibig sabihin ng indigency? Meaning 4Ps ka ba? Ang problema kasi sa batas natin iisa lang ibig sabihin ng indigency. Pero para sa akin iba’t iba ang level ng indigency,” matod ni Escudero.

Gihisgutan usab niya ang mahal nga gasto sa legal nga mga proseso, sama sa annulment, isip pananglitan.

“Hindi naman ganon kadaling pulutin ‘yung ₱200,000 to ₱500,000 na panggastos diyan, ’di ba? So, litigation-indigent siya. ’Pag may nagkasakit sa pamilya mo, tulad ng cancer, cancer-indigent ‘yung pamilya mo,” dugang niya.

Nanawagan si Escudero nga repasuhon ang kasamtangang sistema aron mas mahatagan og proteksyon ang mga pamilyang kalit maatubang og bug-at nga gastuhon.

Gisuportahan ni litigation lawyer Maggie Garduque, nga bisita sa podcast, ang sugyot ni Escudero. Matod niya, mahimong makatarunganon ubos sa equal protection clause sa Konstitusyon ang paghimo og nagkalainlaing klasipikasyon sa indigency base sa kahimtang.

-Ato Ni Bai