Gobyerno Target ang Pagpalapad sa Solar-Powered Irrigation sa Tibuok Nasod

Gitinguha sa Marcos administration nga palapdan sa tibuok nasod ang solar-powered irrigation aron moubos ang gasto sa produksyon sa mga mag-uuma, mapalig-on ang seguridad sa pagkaon ug mamodernisa ang sistema sa irigasyon sa nasod.

Miingon si Acting Executive Secretary Ralph Recto nga target sa Solar-Powered Pump Irrigation Program sa National Irrigation Administration (NIA) nga makaabot sa 10,000 ka lugar sa tibuok nasod sa 2030, gikan sa kasamtangang 4,036 ka lugar sa tanang 17 ka rehiyon.

Tumong sa programa nga makabenepisyo ang duha ka milyon nga mag-uuma, madugangan og 100,000 ka ektarya ang yutang adunay irigasyon ug mapaduol ang sistema sa irigasyon ngadto sa net-zero energy use ubos sa Vision 2030 roadmap sa NIA, sumala sa news release niadtong Domingo.

Makatabang ang mga solar pump sa pagpakunhod sa pagsalig sa mga mag-uuma sa diesel, nga makapamenos sa gasto sa irigasyon ug makapanalipod kanila gikan sa pagsaka-kanaog sa presyo sa krudo. Gipakita sa datos sa NIA nga ang kasamtangang mga sistema makahatag og irigasyon sulod sa unom hangtod walo ka oras matag adlaw.

“This is a long-term investment in food security. Every peso farmers save on diesel can instead be used for seeds, fertilizer, equipment and other needs that directly improve their productivity and income,” matod ni Recto.

Gipares usab sa gobyerno ang solar irrigation sa digital technology, diin nagpalambo ang NIA og artificial intelligence (AI)-based monitoring system nga mogamit og real-time nga datos bahin sa gidaghanon sa tubig, kahimtang sa yuta ug panginahanglan sa irigasyon aron mapauswag ang pag-apod-apod sa tubig ug mapamenos ang mausik.

Sa Bacarra, Ilocos Norte, nakatabang ang 12 ka solar-powered units nga nagsilbi sa 340 ka ektarya aron mapamenos ang gasto sa irigasyon ug mapadayon ang hangtod tulo ka siklo sa pagtanom matag tuig.

Sa Bukidnon, gigamit ang AI-assisted scheduling pinaagi sa datos gikan sa satellite ug pagmonitor sa kaumog sa yuta aron mahibal-an kung pila ka tubig ang gikinahanglan sa mga uma ug kanus-a kini kinahanglan.

Nagpadayon usab sa pag-operate ang mga solar facility sa Pangasinan atol sa dugay nga pagkawala sa kuryente tungod sa Typhoon Egay niadtong 2023, nga nakatabang sa mga mag-uuma sa pagpanalipod sa ilang mga tanom nga wala magsalig sa kuryente gikan sa grid o dugang nga krudo.

“We want to move from traditional irrigation to smart, digital and climate-resilient water management,” matod ni Recto.

“Ang layunin ng Pangulo ay pababain ang gastos ng ating mga magsasaka, paramihin ang kanilang ani at tiyaking may sapat na tubig ang ating mga sakahan kahit humaharap tayo sa climate change,” dugang niya. -Ato ni Bai