Gitugyan sa kampo ni Senador Bato dela Rosa ang 20 ka armas ngadto sa PNP

Gitugyan sa kampo ni Senador Ronald “Bato” dela Rosa ngadto sa Philippine National Police (PNP) ang 20 ka armas nga nakarehistro sa iyang ngalan. Ang adres nga gilista sa rehistro niini nahimutang sa Barangay Ma-a sa Dakbayan sa Davao.

Ang maong mga armas nakarehistro sa ngalan sa senador ubos sa iyang adres sa Barangay Ma-a, Davao City. Ang legal nga representante ni Dela Rosa mao ang mitugyan sa mga armas ngadto sa PNP Regional Civil Security Unit sa Rehiyon 11.

Niadtong Mayo 27, gibawi sa PNP ang lisensya sa armas ni Dela Rosa, nga giatubang karon og warrant of arrest nga gipagawas sa International Criminal Court (ICC). Ang maong mando gipagawas sa PNP Firearms and Explosives Office (FEO).

Ubos sa mando sa FEO, ang 117 ka armas nga nakarehistro sa ngalan ni Dela Rosa kinahanglan dayong kumpiskahon o ideposito ngadto sa FEO o sa Regional Civil Security Unit 11 alang sa hustong disposisyon subay sa balaod.

Nagpagawas ang ICC og warrant of arrest batok kang Dela Rosa may kalabotan sa kaso sa crimes against humanity nga konektado kang kanhing Presidente Rodrigo Duterte, nga may kalabotan sa giingong extrajudicial killings atol sa gitawag nga “war on drugs.”

-Ato ni Bai