Gisuportahan ni Senador Zubiri ang posibleng pagdili sa social media alang sa mga bata human sa pagpamusil sa eskwelahan sa Tacloban

Gipahayag ni Senador Juan Miguel Zubiri ang iyang suporta sa seryosong paghisgot mahitungod sa pagdili o hugot nga paglimite sa paggamit sa social media alang sa mga bata, kasunod sa makalilisang nga insidente sa pagpamusil sa usa ka eskwelahan sa Tacloban City.

Sa iyang pahayag, giingon ni Zubiri nga ang maong trahedya kinahanglan magdasig sa mga awtoridad ug magbabalaod sa pag-atubang sa nagkadakong impluwensya sa social media ngadto sa mga kabatan-onan.

“Kinahanglan nga atong atubangon ang lisod nga kamatuoran nga dako na kaayo ang impluwensya sa social media sa mga bata,” matud niya.

Sumala sa senador, dili lamang bullying ang mahimong makaapekto sa mga menor de edad, kondili usab ang pagtan-aw sa bayolenteng sulod, online nga mga hulga, peligroso nga mga uso, ug mapintas nga pamatasan nga kasagarang makita sa social media.

“Bisan pa og ang usa ka bata dili biktima sa bullying, ang bayolenteng sulod, online nga mga hulga, peligroso nga mga uso ug mapintas nga pamatasan mahimong makatanom og mga ideya sa ilang hunahuna ug makahatag kanila og kaisog sa pagbuhat og mga butang nga dili nila angay hunahunaon,” dugang niya.

Gipasiugda ni Zubiri nga kinahanglan bantayan pag-ayo ang mga bata sa online nga kalibotan tungod kay dali silang maimpluwensiyahan sa ilang makita, mabasa ug mapanood sa social media.

Gikutlo usab niya ang pending nga panukalang balaod sa Senado nga gitawag og Social Media Safety for Children Act, nga nagtumong sa pagdili sa mga batang ubos sa 16 anyos sa pagrehistro, paggamit o pagmintinar og social media accounts.

Matud pa sa senador, daghang nasod ang nagpatuman na o nagkonsiderar og mas hugot nga regulasyon sa paggamit sa social media sa mga menor de edad.

Lakip sa iyang gihisgutan ang Australia, nga nagdili sa paggamit sa social media alang sa mga ubos sa 16 anyos, ingon man ang mga lakang nga gisusi sa United Kingdom, France, Denmark, Greece, Spain, Malaysia ug United Arab Emirates aron mapalig-on ang proteksyon sa mga bata online pinaagi sa mas estriktong age verification ug age restrictions.

Gihatag ni Zubiri ang maong pahayag samtang nagpaabot siya sa iyang pakikiramay sa mga pamilya sa mga namatay ug nasamdan sa insidente sa pagpamusil sa Tacloban ug nanawagan og mas lapad nga mga lakang aron mapanalipdan ang mga bata sulod ug gawas sa eskwelahan.

-Ato ni Bai