Girekomendar nga tangtangon si Karim Khan isip ICC prosecutor tungod sa kunoy dili angayang seksuwal nga relasyon

Ang mga diplomat nga nagdumala sa oversight body sa International Criminal Court (ICC) nagdesisyon nga si ICC prosecutor Karim Khan adunay kunoy dili angayang seksuwal nga relasyon sa usa ka junior staff member ug girekomendar nga tangtangon siya sa katungdanan.

Kini ang unang higayon nga migawas ang mga detalye sa desisyon kalabot sa mga alegasyon sa misconduct nga gisang-at sa usa ka babayeng abogado batok kang Khan niadtong 2024, lakip na ang rekomendasyon nga siya papahawaon sa pwesto.

Ang desisyon sa executive bureau sa governing body sa ICC gamiton isip basehan sa botohan sa 125 ka miyembrong estado sa Assembly of States Parties sa New York sa Hulyo 24. Wala pa mahibaloi kung unsay mahimong resulta sa botohan.

Padayon nga nagdumili si Khan sa mga alegasyon. Matod sa iyang mga abogado, ang desisyon dili subay sa balaod, dili patas sa proseso, ug walay igo nga ebidensiya. Ilang gihisgutan usab ang usa ka pagrepaso sa mga huwes nga miingon nga dili igo ang ebidensiya aron mapamatud-an ang mga alegasyon “labaw sa makatarunganong pagduhaduha.”

KINAHANGLAN ANG MAYORIYANG BOTO ARON MATANGTANG

Kinahanglan ang labing menos 63 sa 125 ka miyembrong estado aron mapasar ang iyang pagtangtang sa katungdanan.

Gisalikway sa bureau ang advisory opinion sa tulo ka external judges ug mihukom nga adunay igo nga ebidensiya aron makadesisyon, base sa report sa usa ka espesyal nga imbestigasyon sa United Nations nga milungtad og usa ka tuig ug gipakomisyon sa korte.

Sumala sa kopya sa desisyon nga nasuta sa Reuters, napamatud-an kuno “labaw sa makatarunganong pagduhaduha” nga si Khan adunay seksuwal nga relasyon sa maong biktima. Nagsugod kuno kini niadtong Marso 2023 ug misamot paglabay sa panahon, ug tungod sa dili patas nga balanse sa gahum, giingon sa bureau nga dili gayod kini mahimong angay nga relasyon.

Sa 27 ka panid nga dokumento nga nakita sa Reuters gikan sa duha ka independente nga tinubdan, giingong nakahimo si Khan og seryosong paglapas sa katungdanan ug seryosong misconduct.

Gikutlo usab sa dokumento ang findings sa U.N. report nga nag-ingon nga misamot kuno ang iyang binuhatan hangtod nga nakahimo siya og dili consensual nga seksuwal nga kontak sa maong babaye sulod sa iyang opisina, sa iyang pribadong pinuy-anan, ug atol sa opisyal nga mga misyon.

Tungod niini, girekomendar sa bureau ang pagtangtang kang Karim Khan sa iyang katungdanan isip prosecutor.

DILI MAAPEKTUHAN ANG MGA ARREST WARRANT

Kaniadto nga defense attorney si Khan sa wala pa siya nahimong pangulong prosecutor sa ICC lima ka tuig ang milabay. Sa pagkakaron, gisuspenso siya sa ICC ug sa independent regulator sa United Kingdom alang sa mga abogado sa korte, nga maghisgot usab sa iyang kahimtang sa umaabot nga mga semana.

Mibalibad sa pagkomento ang ICC, samtang wala usab motubag ang bureau nga gilangkuban sa 21 ka miyembrong estado nga nagrepaso sa kaso.

Ang mga alegasyon batok kang Khan ug ang findings sa korte nakapalalom sa krisis nga dugay nang giatubang sa ICC, nga naa usab sa ilalom sa mga sanctions sa Estados Unidos tungod sa mga imbestigasyon niini batok sa Estados Unidos ug Israel.

Ang mga nagsuporta kang Khan nag-ingon nga nahimo siyang target sa politika human siya mangayo og arrest warrants niadtong 2024 batok sa mga opisyal sa Israel tungod sa paggawi sa Israel sa gubat sa Gaza.

Nagpatuman usab ang Estados Unidos og sanctions batok sa 11 ka huwes ug prosecutor sa ICC, lakip si Khan, tungod sa mga arrest warrant batok kang Israeli Prime Minister Benjamin Netanyahu ug kanhi defense minister Yoav Gallant, ug tungod usab sa usa ka nangaging imbestigasyon sa mga sundalong Amerikano sa Afghanistan.

Bisan pa man kon matangtang si Khan sa katungdanan, magpabilin nga balido ang mga arrest warrant nga naaprobahan na sa mga huwes sa ICC. Ang iyang mga deputy maoy nagdumala sa opisina sa prosecutor sukad siya mikuha og boluntaryong leave niadtong Mayo.

-Ato ni Bai