Gimintinar sa Senate Blue Ribbon Committee nga walay hearing nga gitakda sa Hunyo 16

Gipanghimakak sa Senate Blue Ribbon Committee niadtong Lunes nga adunay gitakdang hearing sa Hunyo 16, 2026, ug mipahilayo kini sa mga pahibalo nga gihimo ni kanhing Kongresista Mike Defensor bahin sa giingong pagdungog sa komite.

Sa opisyal nga pahayag, miingon ang Blue Ribbon Committee, “The public and all concerned stakeholders are hereby advised that no hearing of the Senate Committee on Accountability of Public Officers and Investigations (Blue Ribbon Committee) has been scheduled for June 16, 2026 (Gipahibalo ang publiko ug tanang hingtungdan nga walay hearing sa Senate Committee on Accountability of Public Officers and Investigations (Blue Ribbon Committee) nga gitakda sa Hunyo 16, 2026).”

Midugang pa ang komite nga ang bag-ohay nga mga pahibalo ni Defensor mahitungod sa giingong hearing gihimo “nga walay awtoridad ug aprobasyon gikan sa Komite.”

Gipasiugda usab sa komite nga ang mga hearing sa Senado kinahanglan mosunod sa gitakdang mga proseso, lakip na ang pagpagawas og pormal nga tulo ka adlaw nga pahibalo ug ang pag-apod-apod sa agenda sa dili pa mahitabo ang bisan unsang pagdungog.

Sumala sa komite, ang giingong hearing sa Hunyo 16 wala makatuman niining mga kinahanglanon ug busa dili kini mahimong isipon nga lehitimong pagdungog sa Senado.

“Former Congressman Mike Defensor is neither a member of the Senate, nor the Blue Ribbon Committee (Si kanhing Kongresista Mike Defensor dili miyembro sa Senado ni sa Blue Ribbon Committee),” matod sa pahayag. “Consequently, he is not privy to the official investigations of this body. He possesses no legal standing to announce any proceeding on behalf of the Senate (Busa, wala siyay direktang kahibalo sa mga opisyal nga imbestigasyon niini nga lawas. Wala usab siyay legal nga katungod sa pagpahibalo sa bisan unsang pagdungog alang sa Senado).”

Miingon ang komite nga dili nila tugotan nga gamiton ang ilang ngalan ug ang integridad sa institusyon alang sa mga dili awtorisadong pagpahibalo. Giawhag usab nila ang publiko nga mosalig lamang sa mga opisyal nga pahibalo nga gipagawas sa Blue Ribbon Committee o sa Senado sa Pilipinas.

-Ato ni Bai