Gimando ni Kim Jong Un ang pagtukod og duha ka warship matag tuig sulod sa sunod lima ka tuig

Miingon si Kim Jong Un nga kinahanglan makatukod ang North Korea og duha ka warship nga parehas kadako sa 5,000-toneladang Choe Hyon matag tuig sulod sa sunod lima ka tuig.

Gibutyag ni Kim ang maong plano atol sa commissioning ceremony sa destroyer nga Choe Hyon sa pantalan sa Nampho, sumala sa state media nga Korean Central News Agency (KCNA).

Matod sa KCNA, nahuman sa Choe Hyon ang military operational tests niini sulod sa milabayng 14 ka bulan.

PLANO SAB ANG DUGANG NGA MGA WARSHIP

Miingon usab si Kim nga plano sa nasod nga ipakatap sa dili madugay ang laing 5,000-toneladang destroyer nga ginganlang Kang Kon, uban sa mga 10,000-toneladang strategic warship.

Ang Kang Kon kaniadto giayo human kini partially nga mitagilid atol sa launching ceremony niini sa miaging tuig.

GUSTONG PALIG-ONON ANG KAHIMTANG SA NAVY

Matod ni Kim, ang navy tradisyonal nga labing huyang nga sangay sa armadong pwersa sa nasod, apan ang kapasidad niini mahimong “labaw pa sa mahunahuna sa kadaghanan.”

Miingon usab siya nga ang pagtukod og modernong naval base nahimong importante ug dinaliang buluhaton.

Gipadayag ni Kim nga gihisgutan sa mga opisyal sa ruling Workers’ Party Central Committee ang plano alang sa bag-ong mga naval base atol sa usa ka miting niadtong Lunes.

GIINGONG NAGPADAYON ANG NUCLEARISASYON SA NAVY

Miingon si Kim nga ang labing dakong kausaban sa navy mao ang pagbag-o sa kahimtang, papel, ug gilapdon sa operasyon niini, bisan wala siya maghatag og dugang detalye.

Dugang pa niya, ang nuclearisasyon sa navy “nagpadayon sa kaugalingong direksyon” ug nakatampo sa estratehiya sa nuclear deterrence sa nasod.

-Ato ni Bai