Gihangyo sa House prosecutors nga ablihan ang selyadong BIR records sa impeachment case ni VP Duterte

Gihangyo sa House prosecution panel nga mahatagan sila og akses sa mga tax documents ni Bise Presidente Sara Duterte nga nagpabiling selyado sukad kini giturn over sa Bureau of Internal Revenue (BIR), nga nag-ingon nga ang nagpadayong pretrial proceedings mao ang hustong higayon aron masusi ang sulod niini.

Miingon si Leila de Lima, miyembro sa prosecution team, nga nagsumite sila og manifestation niadtong Miyerkules nga naghangyo sa Senate impeachment court nga tugotan ang pag-abli sa selyadong kahon sa BIR aron maimbentaryo ang sulod niini isip kabahin sa proseso sa pagmarka sa mga ebidensiya.

Matod ni De Lima, ang maong lakang makatabang sa mas episyente ug mas paspas nga pagdumala sa impeachment trial.

NALAMBIGIT SA ALEGASYON SA KUNOY DILI MASABTAN NGA BAHANDI

Ang mga dokumento nalambigit sa Article II sa impeachment complaint, nga may kalabotan sa mga alegasyon sa kunoy dili masabtan nga bahandi. Kaniadto, gisubpoena sa House panel ang income tax returns ni Duterte isip kabahin sa ilang imbestigasyon.

Apan niadtong Abril, mibotar ang mga miyembro sa House Justice Committee nga magpabiling selyado ang kahon human ang BIR mitudlo sa mga limitasyon ubos sa National Internal Revenue Code.

Matod sa BIR, ang mga tax return mahimo lamang ipagawas ubos sa piho nga mga kahimtang ug kinahanglan susihon sa executive session imbis sa publikong pagdungog.

Miingon si De Lima nga nanghinaot ang prosecution panel nga maablihan ang kahon sa dili pa matapos ang pretrial ug sa dili pa magpagawas ang impeachment court sa pretrial order.

NANGAYO USAB OG GIYA SA UBANG ISYU SA PAGHUKOM

Gawas sa hangyo nga maablihan ang BIR records, gihangyo usab sa prosecution panel nga ilhon ang English ug Filipino isip opisyal nga mga pinulongan sa impeachment trial.

Nangayo usab sila og giya sa implementasyon sa three-day disclosure rule alang sa mga surprise witness ug ebidensiya, ug misugyot nga tugotan ang publiko ug pribadong mga prosecutor nga makapangutana sa mga saksi.

Wala pa pormal nga motubag ang kampo ni Duterte sa maong filing.

Matod ni abogado Michael Poa, usa sa legal counsel ni Duterte, wala pa nila masusi pag-ayo ang dokumento apan pormal silang motubag sa maong manifestation.

-Ato ni Bai