Gatchalian: ₱180.48 bilyon gikan sa 2026 budget andam para sa pagresponde sa linog sa Mindanao

Human sa kusog nga linog nga miresulta sa kamatayon ug kadaot sa mga imprastruktura, gipadayag ni Senate President Pro Tempore Sherwin Gatchalian nga adunay total nga ₱180.482 bilyon gikan sa 2026 national budget nga mahimong magamit dayon alang sa emergency response, relief, ug rehabilitation efforts sa Mindanao.

“Ang importante magamit natin agad ang mga pondo na ito dahil marami tayong kababayan na apektado at nangangailangan ng agarang tulong mula sa gobyerno, (Ang importante, magamit dayon nato kining mga pondo kay daghan sa atong mga kaigsuonan ang apektado ug nagkinahanglan og dayon nga tabang gikan sa gobyerno),” matod sa senador.

Gipunting usab sa senador ang dayon nga magamit nga ₱17.898 bilyon gikan sa National Disaster Risk Reduction and Management Fund (NDRRMF), nga mao ang pangunang pondo sa gobyerno alang sa pagresponde, rehabilitasyon, pagtukod pag-usab sa imprastruktura, ug mga operasyon sa pagpasig-uli human sa kalamidad.

Gidugang pa niya ang uban pang tinubdan sa pondo, lakip ang ₱32.307 bilyon ubos sa Local Government Support Fund–Financial Assistance to Local Government Units, ₱15.897 bilyon ubos sa Contingent Fund, ug ₱8.163 bilyon ubos sa Quick Response Fund sa lain-laing ahensya sa gobyerno.

Samtang ang Department of Social Welfare and Development (DSWD) adunay ₱46.778 bilyon nga magamit ubos sa programa niini alang sa pagtabang sa mga indibidwal ug pamilya nga anaa sa krisis.

Alang sa sektor sa edukasyon, ang Department of Education (DepEd) adunay ₱4.08 bilyon nga pondo alang sa disaster preparedness ug response, kauban usab ang mas dako nga ₱67 bilyon nga badyet karong tuiga nga gitagana alang sa pagtukod sa mga classroom, nga mahimong magamit usab sa pag-ayo sa mga eskwelahan nga nadaot sa linog.

“Napakahirap ng sitwasyon ngayon ng ating mga eskwelahan dahil maraming school buildings ang naapektuhan ng lindol. Inaasahan nating magamit agad ang pondong ito para sa kapakanan ng ating mga estudyante sa Mindanao (Lisod kaayo ang kahimtang karon sa atong mga eskwelahan kay daghang school buildings ang naapektuhan sa linog. Gilauman nato nga magamit dayon kining mga pondo alang sa kaayohan sa atong mga estudyante sa Mindanao),” matod sa senador.

Sumala pa niya, adunay dugang nga pondo alang sa rehabilitasyon sa mga lugar nga naapektuhan sa linog, lakip ang ₱1.657 bilyon gikan sa Department of Social Welfare and Development–OSEC, ₱230.515 milyon gikan sa Department of Agriculture–OSEC, ug ₱46.882 milyon gikan sa laing alokasyon sa DSWD–OSEC.

-Paraluman News