Duha ka nagkabangi nga grupo sa MILF sa Maguindanao nagkauli na

Malampusong napasig-uli sa mga pulis ug militar ang duha ka nagkabangi nga grupo sa Moro Islamic Liberation Front (MILF) sa lungsod sa Shariff Aguak, Maguindanao del Sur niadtong Miyerkules.

Gipasiugdahan ni Col. John Michael Mangahis, direktor sa kapulisan sa Maguindanao del Sur, ang panaghisgot tali sa duha ka grupo.

Nagtinabangay ang kapulisan, Army, lokal nga mga opisyal, ug mga representante sa Bangsamoro Islamic Armed Forces sa MILF aron tapuson ang dugay nang panagbangi sa mga pamilya o ‘rido,’ mapugngan ang dugang nga engkuwentro, ug makab-ot ang malungtarong malinawong kasabotan.

“The long-standing rivalry between the two groups had escalated into armed confrontations,” matod ni Mangahis sa usa ka interbyu niadtong Huwebes.

Dugang niya, napugos usab sa pagbiya sa ilang mga balay ang 100 ka pamilya sa Barangay Malingao ug Barangay Lapok tungod sa bag-ohay nga mga engkuwentro. Ang panagsang pagpamusil sulod sa milabay nga duha ka semana miresulta sa kamatayon sa usa ka bata nga naigo sa nahisalaag nga bala, samtang usa ka lalaki ang nasamdan.

Gidayeg ni Mangahis sila si Bro Abid sa MILF 105th Base Command ug Samad Simpal sa MILF 118th Base Command tungod sa ilang pag-apil ug pagsuporta sa mga paningkamot alang sa kalinaw.

Gipasiugda sa mga otoridad ang kamahinungdanon sa pagmintinar sa kalinaw ug kahapsay, pagpugong sa kaugalingon, paglikay sa pagpanimalos, ug pagsulbad sa mga panagbangi pinaagi sa malinawon ug legal nga mga paagi.

Matod ni Anwar Emblawa, executive assistant ni Shariff Aguak Mayor Akmad Mitra Ampatuan, giatiman na karon sa lokal nga panggamhanan ang mga panginahanglan sa mga pamilyang naapektuhan. Nakahatag na usab og pinansyal nga tabang sa mga pamilya sa mga sibilyang namatay ug nasamdan.

“Mayor Mitra Ampatuan is actively supporting all peace efforts because the beneficiaries of this program are his constituents who have longed for peace,” matod ni Emblawa sa laing interbyu niadtong Huwebes.

Gipasiugda niya nga importante ang padayong suporta sa lokal nga panggamhanan sa Shariff Aguak ug sa mga kauban niini sa pagpasiugda sa kalinaw aron malikayan ang dugang nga armadong panagsangka ug makab-ot ang malungtarong kalinaw, seguridad, ug kalig-on sa lungsod.

Samtang, lima ka miyembro sa Karialan faction sa Bangsamoro Islamic Freedom Fighters (BIFF) ang mitahan sa mga otoridad niadtong Miyerkules. Gitugyan usab nila ang duha ka rocket-propelled grenade atol sa ilang pagtahan sa estasyon sa kapulisan sa lungsod.

Matod ni Maj. Joel Lebrilla, hepe sa kapulisan sa lungsod, gikapoy na ang lima sa armadong pakigbisog nga wala silay nakita nga kapuslanan ug gusto na silang magpuyo og normal uban sa ilang mga pamilya. -Ato ni Bai