DOJ Nangayo sa Senado nga Ibalik ang ₱1.1-Bilyon nga Confidential Fund

Gihangyo sa Department of Justice (DOJ) niadtong Huwebes ang mga senador nga ibalik sa 2026 level nga mokabat og ₱1.1 bilyon ang confidential funds niini, tungod kay matod sa ahensiya, mahimong maapektuhan sa pagkunhod sa pondo ang pagtigom og impormasyon, witness protection ug mga operasyon batok sa trafficking ug cybercrime.

Atol sa deliberasyon sa Senado sa gisugyot nga 2027 budget sa DOJ, matod ni Justice Secretary Fredderick Vida nga naglaom ang departamento nga mapabilin ang lebel sa pondo karong tuiga imbis nga mokunhod ngadto sa mga ₱579.4 milyon nga gilatid alang sa sunod tuig.

“Ang amin pong hiling sana ay maibalik man lang yung 2026 level para hindi maapektuhan nang malaki,” matod ni Vida.

Kabahin ang gisugyot nga mga alokasyon sa ₱7.2-trillion National Expenditure Program (NEP) alang sa 2027 nga gisumite sa executive branch ngadto sa Congress.

Matod ni Vida, mabati ang pagkunhod sa pondo sa pipila ka confidential activities sa departamento.

Alang sa DOJ central office, matod niya nga ₱34 milyon lamang ang gisugyot kumpara sa ₱214 milyon nga ilang gipangayo, samtang mga ₱319.9 milyon ang gigahin alang sa Witness Protection Program imbis nga ₱500 milyon nga gustong ibalik sa departamento.

Gihisgotan usab niya ang Inter-Agency Council Against Trafficking, nga adunay ₱10 milyon, ug miingon nga gikinahanglan ang dugang nga pondo samtang nagkadaghan ang mga hagit sa mga operasyon niini.

Partikular nga gihisgotan ni Vida ang gisugyot nga confidential fund alang sa cybercrime operations, ug miingon nga gusto sa DOJ nga ibalik ang pondo tungod kay nagkinahanglan ang maong trabaho og koordinasyon tali sa departamento, National Bureau of Investigation (NBI), Department of Information and Communications Technology ug ubang mga ahensiya.

Matod ni Senator Panfilo Lacson atol sa hearing nga ang tinuig nga confidential fund nga gilatid alang sa cybercrime work sa DOJ mokabat lamang og mga ₱35,000 matag bulan.

“Kung i-divide mo ng 12, 35,000 a month? … Ano ma-accomplish mo” matod ni Lacson.

Gihangyo usab ni Vida nga hatagan og labing menos ₱5 milyon ang National Coordination Center against Online Sexual Abuse or Exploitation of Children and Child Sexual Abuse or Exploitation Materials, nga matod niya walay nadawat nga confidential fund ubos sa proposal.

Matod niya, nagkakomplikado ang pagsumpo sa maong mga kalapasan.

Matod ni Senate Committee on Finance chair Joseph Victor “JV” Ejercito nga mas hugot nga susihon ang confidential ug intelligence funds atol sa budget deliberations karong tuiga, apan iyang giila nga adunay operational requirements alang sa maong pondo ang mga ahensiyang nalambigit sa law enforcement, investigation ug national security.

Samtang, nagpabilin ang ₱20-milyon nga confidential fund sa Bureau of Immigration ubos sa proposal, parehas sa kantidad karong tuiga.

Matod ni Immigration Commissioner Joel Anthony Viado, dako og ikatabang ang dugang nga pondo sa intelligence force nga wala moabot og 100 ka agents nga nag-operate sa tibuok nasod, lakip ang mga operasyon niini sa pagpangita sa mga pugante.

“Nationwide po ang operations namin. So makakatulong po nang malaki kung iyan po ay madadagdagan,” matod ni Viado.

-Ato ni Bai