China Nagpahamtang og Silot sa mga Ministro sa Belize ug Paraguay Tungod sa Taiwan

Gipahamtangan sa China og mga silot sugod niadtong Lunes ang communications minister sa Paraguay ug ang foreign minister sa Belize tungod sa diplomatikong relasyon sa ilang mga nasod sa Taiwan, nga giangkon sa Beijing nga bahin sa teritoryo niini.

Ang Paraguay ug Belize duha sa 12 na lamang ka nasod nga adunay pormal nga diplomatikong relasyon sa Taiwan. Giingon sa China nga ang Taiwan usa lamang sa iyang mga probinsya ug walay katungod nga ilhon isip kaugalingong estado, apan hugot kining gisupak sa gobyerno sa Taipei.

Kadaghanan sa mga silot simboliko lamang tungod kay ang mga ministro sa mga nasod nga adunay diplomatikong relasyon sa Taiwan kasagarang dili mobiyahe ngadto sa China. Kaniadto, ang susamang mga silot kasagarang gipahamtang sa mga politiko sa Kasadpan tungod sa ilang pagsuporta sa Taiwan nga adunay demokratikong gobyerno.

Wala dayong mitubag ang Ministry of Information and Communication Technologies sa Paraguay ug ang foreign ministry sa Belize sa mga hangyo alang sa komentaryo gawas sa regular nga oras sa trabaho. Wala usab dayong mikomentaryo ang foreign ministry sa Taiwan.

Gipasabot sa foreign ministry sa China nga ang pagpanalipod sa nasodnong soberanya ug seguridad maoy hinungdan sa mga silot. Matod niini, adunay mga politiko sa Belize ug Paraguay nga "anti-China" tungod sa ilang pagduso nga magpabilin ang diplomatikong relasyon sa ilang mga nasod sa Taiwan.

Lakip sa mga silot ang pagdili sa mga apektadong opisyal nga makakuha og visa aron makasulod sa Hong Kong ug Macau. Gidid-an usab ang mga organisasyon ug indibidwal sa China nga makigtransaksyon, makigtambayayong, o moapil sa ubang kalihokan uban kanila, sumala sa duha ka pahibalo sa ministeryo.

Nakigkita si Belize Foreign Minister Francis Fonseca sa iyang katumbas sa Taiwan nga si Lin Chia-lung didto sa Belize niadtong miaging bulan. Niadtong Hunyo, nakigkita usab si Paraguay Minister of Information and Communication Technologies Gustavo Villate kang Taiwan Deputy Foreign Minister Chen Ming-chi sa Paraguay.

Gipalig-on sa China ang pagpamugos sa nahibiling mga nasod nga adunay diplomatikong relasyon sa Taiwan aron putlon ang ilang relasyon sa Taipei.

Ang Nauru, usa ka gamay nga nasod sa Pacific Islands, maoy labing bag-ong miputol sa diplomatikong relasyon sa Taiwan niadtong 2024. Sa miaging tuig niini, 2023, gitapos usab sa Honduras ang ilang diplomatikong relasyon sa Taiwan nga milungtad og daghang dekada. -Ato ni Bai