BARMM Interim Chief Nanawagan alang sa Malinawon ug Hapsay nga Eleksyon

Nanawagan si Bangsamoro Autonomous Region in Muslim Mindanao (BARMM) interim Chief Minister Abdulraof Macacua sa mga botante nga mogawas ug mobotar aron mahimong hapsay ug malinawon ang eleksyon, usa ka adlaw sa wala pa ang makasaysayang Bangsamoro Parliamentary Elections (BPE).

“This is more than just electing leaders, but it is proof of how far we have progressed in the peace process,” matod ni Macacua sa iyang video message nga gipasalida niadtong Domingo.

Miingon siya nga ang eleksyon nagtimaan sa pagsulod sa BARMM sa bag-ong yugto sa panaw padulong sa kalinaw.

“Let us respect everyone’s right to choose and not allow our differences to become a reason for our communities to clash,” matod ni Macacua.

Giawhag niya ang mga kandidato ug mga botante nga likayan ang pagdaot sa usag usa ug hugaw nga politika.

“Let us also be responsible with the words we use and the stories we spread. Let us not exaggerate matters that could reopen the wounds of the past and revive suspicions among the Bangsamoro, the national government, and our fellow Filipinos,” matod ni Macacua, nga kandidato alang sa parliamentary seat nga nagrepresentar sa Fifth District sa Maguindanao del Norte.

“Our votes may be different but we share one desire to make them the key to our future. Whatever the outcome of the election, we will continue to work together in building the Bangsamoro.”

Mga magtutudlo miatras sa election duties

Samtang, kapin sa 800 ka public school teachers nga gitahasan nga mahimong electoral board (EB) members ang miatras sa ilang katungdanan, matod ni Commission on Elections Chairperson George Garcia didto niadtong Domingo.

Sa usa ka interbyu, miingon si Garcia nga kadaghanan sa mga magtutudlo paryente sa mga kandidato.

Miingon si Garcia nga mga police officer nga gibansay sa Department of Science and Technology ang mipuli isip EB members.

“We have anticipated this so we are prepared,” matod ni Garcia.

Sa Cotabato City lamang, 137 ka magtutudlo ang wala motunga atol sa final testing and sealing sa automated counting machines niadtong Sabado.

Ang ubang mga magtutudlo nga miatras gikan sa Lanao del Sur, Maguindanao del Sur, Maguindanao del Norte, Tawi-Tawi ug BARMM Special Geographic Area. -Ato ni Bai